Sýret: Regnum
2024 jyly asfalttalatyn respýblikalyq jeliniń avtojoldary belgili boldy, dep habarlaidy "Ult aqparat".
Kólik ministrliginiń málimetinshe, "Astana – Almaty" avtomobil jolyn rekonstrýktsiialaý jobasyn júzege asyrý aiasynda shamamen 2,5 million tonna asfalt tóseý josparlanýda.
"Qazirgi ýaqytta respýblikalyq mańyzy bar avtojoldarǵa bir million tonnaǵa jýyq asfaltbeton tóseldi. Máselen, Astana men Almatyny jalǵaityn "Ortalyq – Ońtústik" dálizin rekonstrýktsiialaý jobasyna 560 myń tonna asfaltbeton tóselgen. "Aqtóbe – Qandyaǵash" jobasynda 125 myń tonna asfalt tóseldi jáne t.b.", - dedi QR Kólik ministrligi Avtomobil joldary komitetiniń tóraǵasy Tólegen Abdýllin.
"Taldyqorǵan – Óskemen" tasjolyn rekonstrýktsiialaý barysynda 638 myń tonna asfaltbeton paidalaný kózdelgen. Al "Atyraý – Astrahan" avtojolyn rekonstrýktsiialaýdy aiaqtaýúshin 500 myń tonnaǵa jýyq asfaltbeton tóseý josparlanýda.
Aita keteiik, biylǵy jol qurylysy maýsymy aiasynda QR Kólik ministrligi 12 myń shaqyrym joldy qurylys jumystarymen qamtymaq.
"Bul – rekordtyq kórsetkish. Máselen, respýblikalyq mańyzy bar 5,3 myń shaqyrym jolda jóndeý jumystary jalǵasyn tapsa, 4,2 myń jergilikti mańyzǵa ie jol jóndeý jumystarymen qamtylady",- delingen vedomstvo habarlamasynda.
Sonymen qatar Kólik ministrligi salynǵannan beri jóndeý jumystary júrgizilmegen joldardy ortasha jóndeýmen qamtý boiynsha jańa aýqymdy baǵdarlamany iske asyrady. 2,5 myń shaqyrym jol ortasha jóndeý jumystarymen qamtylady.
Bul oblysaralyq bailanysty aitarlyqtai jaqsartýǵa múmkindik beredi. Mysaly, 4 oblystyń aýmaǵy arqyly ótetin "Jezqazǵan – Petropavl" avtojoly ortasha jóndeý jumystarymen qamtylady. Aqtóbe oblysyndaǵy "Qandyaǵash – Embi – Shalqar – Yrǵyz" tasjolyn, al Shyǵys Qazaqstan jáne Abai oblystarynda Óskemen men Semei arasyndaǵy avtomobil joly jóndelmek.
27 mamyrda "Aqtóbe-Qandyaǵash" avtojolynyń jóndeý jumystary qashan aiaqtalatyny belgili boldy.
