Biyl iri halyqaralyq jarystarda qazaqstandyq oqýshylar 26 medal jeńip aldy. Bul týraly QR Bilim jáne ǵylym ministri Ashat Aimaǵambetov málim etti, dep habarlaidy "Ult aqparat".
«Halyqaralyq Olimpiada júldegerlerimen beiresmi kezdesý ótkizdim. Biyl iri halyqaralyq jarystarda oqýshylarymyz 26 medal jeńip aldy, onyń ishinde 2 altyn, 13 kúmis jáne 11 qola. Nátijesinde, sońǵy jyldardaǵy rekord jańartyldy. Kezdesýge qatysqan balalar jeńiske jetý jolyndaǵy qyzyqty oqiǵalarymen bólisip, usynystaryn aitty, sonymen qatar suraqtaryna jaýaptar aldy , - dep jazdy ministr áleýmettik jelidegi paraqshasynda.
Osy oraida A. Aimaǵambetov oqýshylarmen jáne jattyqtyrýshylarmen olimpiadalyq qozǵalysty aldaǵy ýaqytta odan ári damytý baǵyttary talqylanǵanyn aitty.
Biyl olimpiadanyń respýblikalyq kezeńi jańa elektrondyq formatta ótti. Sondai-aq akademiialyq adaldyqty qamtamasyz etý maqsatynda jańa sharalar qabyldandy.
«Jattyqtyrýshylar men mektep oqýshylary osy baǵyttaǵy jumysty kúsheitý boiynsha qosymsha qadamdar usyndy. Daryndy balalardy qoldaý máselesine keletin bolsaq, qazirgi tańda el Prezidenti Qasym-Jomart Kemeluly Toqaevtyń tapsyrmasyna sai ministrlik bul baǵytta júieli jáne keshendi sheshimder ázirlep jatyr. Kezdesý sońynda Olimpiada júldegerlerine Memleket basshysynyń atynan Alǵys hattar tabys etildi. Sonymen birge biz jattyqtyrýshylardyń eńbegin de atap óttik. Buǵan deiin meniń atymnan 3 myń daryndy balanyń ata-analaryna Alǵys hattar jiberilgen bolatyn. Men olimpiada qatysýshylarynyń muǵalimderine, ata-analary men jattyqtyrýshylaryna taǵy da alǵys aitqym keledi. Sizderdiń mundai nátijelerge qol jetkizýde eńbekterińiz orasan zor. Óz kezeginde Bilim jáne ǵylym ministrligi oqýshylarymyzdyń biik belesterdi odan ári baǵyndyryp, Qazaqstandy álemdik arenada laiyqty deńgeide tanytýlaryna jaǵdai jasaýdy jalǵastyratynyn atap ótkim keledi», - dedi vedomstao basshysy.
