2021 jyldyń sońyna qarai halyqty gazdandyrý deńgeii 53,7 paiyzdy quraidy. Bul týraly QR Energetika ministrliginiń alqa májilisinde vedomstvo basshysy Nurlan Noǵaev málim etti, dep habarlaidy QazAqparat.
«2020 jyly 51 gazdandyrý jobasyn iske asyrý úshin 38,4 mlrd teńge bólindi. 13,8 mlrd teńge somasyndaǵy 19 jobany aiaqtaý nátijesinde eldi gazdandyrý deńgeii 53,07 paiyzdy qurady nemese 9,84 mln adam tabiǵi gazǵa qol jetkizdi. Memleket basshysynyń tapsyrmalaryna sáikes taldaý júrgizilip, quny 302 mlrd teńgeden asatyn, paidalanýshy uiymdardyń teńgerimine berilmegen 1 227 nysan anyqtaldy. Búgingi tańda jalpy somasy 74,5 mlrd teńge bolatyn 318 nysan tapsyryldy», - dedi ministr.
2020 jylǵy naýryzda Qazaqstan Respýblikasy men Resei Federatsiiasynyń Úkimetteri arasyndaǵy «Baiqońyr» keshenin gazben jabdyqtaý týraly kelisimdi ratifikatsiialaý týraly Qazaqstan Respýblikasynyń Zańy qabyldandy. Atalǵan Kelisim Baiqońyr qalasynyń turǵyndaryna kommýnaldyq qyzmetterdi tóleý shyǵyndaryn azaitýǵa múmkindik berdi.
«2021 jyldyń sońyna qarai halyqty gazdandyrý deńgeii 53,7 paiyzdy qurap, 119 myń adam gazǵa qol jetkizetin bolady. Sonymen qatar 2021 jyly Gaz salasyn damytýdyń keshendi josparyn ázirleý jáne Qazaqstan Respýblikasyn gazdandyrýdyń bas shemasyn ózektendirý boiynsha jumys júrgiziledi. Bul elimizdiń energiia resýrstaryn tiimdi paidalanýǵa jáne gaz taratý jelilerin salý kezinde biýdjet qarajatyn ońtaily bólýge múmkindik beredi», - dedi N. Noǵaev.
