Jyl basynan beri biýdjettiń 65 mlrd teńgesi atqarylmaǵan, onyń ishinde 7 mlrd teńge – únemdelse, 58 mlrd teńge - igerilmegen. Bul týraly QR Premer-Ministriniń orynbasary – Qarjy ministri Erulan Jamaýbaev aitty, dep habarlaidy QazAqparat.
«Jyl basynan beri memlekettik biýdjettiń shyǵystary 98,5%-ke, respýblikalyq biýdjettiń shyǵystary – 99,1%-ke, jergilikti biýdjetterdiń shyǵystary 98,3%-ke atqaryldy. Respýblikalyq biýdjet boiynsha 6,9 trln teńge somasyna shyǵystar júrgizildi. Sonymen birge, biýdjettiń 65 mlrd teńgesi atqarylmaǵan, onyń ishinde 7 mlrd teńge – únemdelgen, 58 mlrd teńge igerilmei qalǵan», - dedi Qarjy ministri Úkimettiń búgingi otyrysynda.
Igerilmeýdiń anaǵurlym iri somalary tótenshe jaǵdailar, ishki ister, densaýlyq saqtaý, ekologiia, geologiia jáne tabiǵi resýrstar ministrlikterinde baiqaldy.
Igerilmeýdiń negizgi sebepteri: konkýrstyq rásimder men sharttar jasasý rásimderiniń uzaq júrgizilýi, oryndalǵan jumystar aktilerin, shot-faktýralardy ýaqtyly usynbaý, tóleýge beriletin shottardyń kesh usynylýy.
Jergilikti biýdjetterdiń shyǵystary 3,5 trln teńgeni qurady. 61 mlrd teńge atqarylmai qalǵan.
«Biyl óńirlerge 3,3 trln teńge somasynda nysanaly transfertter kózdelgen. Olarǵa 1 maýsymǵa 933 mlrd teńge bólingen. Onyń 98,2%-i igerilgen. 17 mlrd teńge atqarylmai qaldy, onyń ishinde 4 mlrd teńge únemdelse, 13 mlrd teńgesi igerilmegen», - dedi Jamaýbaev.
Eń kóp igerilmegen soma Nur-Sultan qalasynda, Mańǵystaý, Almaty jáne Qyzylorda oblystarynda baiqalady.
Onyń negizgi sebepteri - tólemniń negizdiligin rastaityn qujattardyń usynylmaýy, jobalyq-smetalyq qujattamany túzetý, oryndalǵan jumys aktilerin ýaqtyly usynbaý, konkýrstyq rásimderdiń uzaq júrgizilýi, tóleýge beriletin shottardyń qazynashylyq organdaryna kesh usynylýy.
