Elimizde sý tasqyny bolatyn kezeń aiaqtaldy. Bul týraly QR Ekologiia, geologiia jáne tabiǵi resýrstar vitse-ministri Sergei Gromov QR Jemqorlyqqa qarsy is-qimyl qyzmetiniń saitynda ótken onlain suhbatta aitty, dep habarlaidy QazAqparat.
«Buryn jer telimderi zańsyz berilgen. Buryn da, qazir de sý mańyna jaqyn jerge qurylys salýǵa tyrysatyndar kóp. Bulai etýge bolmaitynyn aitqym keledi. Tabiǵat, sý árdaiym óz degenin isteidi. Mysaly, ózen arnasyn birneshe shaqyrym qashyqtyqqa buryp tastady delik, al 50-100 jyldan keiin ol óz arnasyn taýyp almaitynyna kepildik joq», - deidi QR Ekologiia, geologiia jáne tabiǵi resýrstar vitse-ministri.
Ol sý mańyna úiler men saiajai salýǵa bolmaitynyn aitty.
«Almatydan bastap Oralǵa deiin barlyq óńir úi, saiajaidy sý mańyna salady. Sosyn saiajaidy sý basady. Mundai jaǵdaida bir ǵana sheshim – sý mańynda turatyndardy basqa aýylǵa kóshirý kerek nemese sýdy dambymen qorshaý kerek. Jalpy alǵanda sý tasqyny bolatyn kezeń aiaqtaldy. Sý basqan saiajailarda eshkim zardap shekpedi. Ázirge memleket biýdjetinen sý tasqynyna qatysty eshqandai shyǵyn bolǵan joq», - deidi Sergei Gromov.
