Biyl elimizdegi barlyq deńgeidegi olimpiada elektrondy formatta ótti. Bul týraly Qazaqstannyń bilim jáne ǵylym ministri Facebook-tegi paraqshasynda málimdedi, - dep habarlaidy "Ult aqparat".
"Keshe Almatyda qala mektepterinde oqityn respýblikalyq olimpiadanyń jeńimpazdary men júldegerlerin quttyqtadym. Jeńimpazdarǵa diplomdaryn tabystap, daryndy balalardyń suraqtaryna jaýap berdim.
Biyl júldeli oryndardy elimizdiń barlyq aimaǵynyń 920 qatysýshysy ielendi. 183 oqýshy altyn, 274 oqýshy kúmis jáne 463 oqýshy qola medal iegeri atandy.
Olar aýdandyq, qalalyq, oblystyq olimpiadalardyń eleginen ótip, respýblika kólemindegi úzdikterdiń úzdigi atandy.
Jas qatysýshylardyń jeńisteri barynsha ádil bolýy úshin biyl biz barlyq deńgeidegi olimpiadany ótkizý protsesin avtomattandyrdyq. Iaǵni olar elektrondy formatta ótti.
Byltyr oqýshylarymyzdyń álemdik deńgeidegi olimpiadalarda jeńip alǵan medaldary rekordtyq kórsetkishke jetti. Biyl óz rekordymyzdy jańartamyz dep úmittenemin" - dep jazdy ministr.
Sondai-aq ol sózinde Memleket basshysy Qasym-Jomart Toqaevtyń daryndy balalardy qoldaýǵa erekshe kóńil bóletinin atap ótti.
"Jaqynda Prezident halyqaralyq pándik olimpiada jeńimpazdaryna birjolǵy aqshalai tólemderdi tóleý normasyn qarastyratyn zańǵa qol qoidy. Altyn medal alǵan oqýshyǵa 1 500 AEK, kúmis medalǵa 1 000 AEK, qola medalǵa 500 AEK kóleminde aqshalai syiaqy beriledi.
Oqýshylardy jarysqa daiyndaǵan pedagogterge de birjolǵy syiaqy beriledi. Odan bólek, halyqaralyq olimpiadalardyń jeńimpazdary men júldegerlerine qazaqstandyq JOO-ǵa túsý úshin avtomatty túrde granttar beriledi.
Bilim jáne ǵylym ministrligi elimizde balalarǵa jaǵdai jasaý jáne olimpiadalyq qozǵalysty damytý jumystaryn jalǵastyra beredi.
Qurmetti oqýshylar, qyzyqty kezdesý, jaǵymdy emotsiia jáne oqýdaǵy jetistikterińiz úshin rahmet! Munymen toqtap qalmai, tek alǵa umtyla berińizder" - dedi Aimaǵambetov.
