Biyl 9 mamyr Jeńis kúni qarsańynda elordalyq ekinshi dúniejúzilik soǵysqa qatysqan ardagerlerge 1 mln-nan astam syiaqy tólenbek. Bul týraly Nur-Sultan qalasy jumyspen qamtý jáne áleýmettik qorǵaý basqarmasy basshysynyń mindetin atqarýshy Ilia Skýb málim etti, dep habarlaidy QazAqparat.
«Biyl Jeńis kúnin merekeleýge bailanysty Uly Otan soǵysy ardagerlerine qosymsha áleýmettik kómek kórsetý týraly máslihat sheshimderiniń jobalaryn qaraý usynylady. Osy jyly elordada 18 soǵys ardagerine 1 005 221 teńge kóleminde syiaqy tóleý josparlanyp otyr», - dedi Ilia Skýb elorda máslihatynyń otyrysynda.
Sóz alǵan qalalyq máslihat depýtaty Baýyrjan Janqonaqov soǵys ardagerlerine beriletin syiaqy kóleminiń azdyǵyn alǵa tartty.
«Menińshe, ardagerlerge beriletin syiaqynyń kólemi az. Elorda boiynsha nebári 18 ardager qalǵan, soǵysty kórgen sońǵy jandar. Ardagerler 1 mln teńge ǵana emes, odan kóp syiaqyǵa laiyqty», - deidi ol.
Depýttatyń bul oiyna qatysty qalalyq jumyspen qamtý jáne áleýmettik qorǵaý basqarmasy basshysynyń mindetin atqarýshy Ilia Skýb pikir bildirdi.
«Astanalyq soǵys ardagerlerine Jeńis meiramy qarsańynda qarjylyq qoldaý jyl saiyn kórsetilip keledi. Syiaqynyń kólemin QR Eńbek jáne halyqty áleýmettik qorǵaý ministrligi belgilep otyr. Ministrliktiń belgileýi boiynsha elimizdiń barlyq óńirinde qoldaý birdei deńgeide kórsetilýi tiis», - dep jaýap qatty basqarma basshysy.
