Biyl Almaty oblysynda týý kórsetkishi joǵary. Oblystyq perinataldyq ortalyqta jyl basynan beri 5200-den asa sábi dúniege keldi. Olardyń basym bóligi - ul balalar, dep habarlaidy QazAqparat tilshisi.
Uldy bolǵandardyń biri - Elvira Nuǵmanova. Úsh qyzynan keiin kópten kútken uldary dúniege keldi. Atasy yrymdap nemeresin Aqberen dep atapty. «Balanyń salmaǵy 4kg 200 gr. Boiy 56 sm. Kóp balaly ana atanyp jatyrmyz. Óte qýanyshtymyz», - deidi taldyqorǵandyq Elvira.
Taldyqorǵan qalasyndaǵy oblystyq perinataldyq ortalyqta kúnine 20-ǵa jýyq áiel bosanady. Atalǵan perzenthana oblystyń 7 aýdany men 2 qalasyna qyzmet kórsetedi. Mundaǵylar úshin bir sátke de tynym joq. Ýaqytynan buryn bosaný, josparsyz júkti bolý syndy jaittar jiilegen. Saldarynan 700 gramm salmaqtaǵy sábiler dúniege kelip jatyr.
Sol sebepti, ár júktilikti josparlaý kerek dep, dárigerler keńes beredi. Jáne jylda-jylda júkti bolý ananyń da balanyń da densaýlyǵynyń tómendeýine ákeledi, deidi Almaty oblystyq perinataldyq ortalyǵynyń direktory Qalihan Jumashev.
Sonymen qatar, kóp jaǵdaida jas analar bosanýǵa daiyn bolmai keledi eken. Arnaiy sabaqtarǵa qatyspaidy, saldarynan tolǵaq kezinde qinalady.
Sondai-aq sońǵy jyldary kesir tiligi arqyly bosanatyndar sany da kúrt kóbeidi. Sebebi ózdiginen bosanýǵa analardyń aǵzalary álsiz. Bul óz kezeginde názik jandylardyń óz densaýlyqtaryna nemqurailyq tanytýynan bolyp otyr deidi mamandar. Degenmen, qazir ozyq tehnologiialardyń arqasynda bala men ana ómirin saqtap qalýǵa barlyq jaǵdai qarastyrylǵan.
