QR Premer-Ministriniń orynbasary Berdibek Saparbaev biyl áleýmettik máselelerdiń nelikten shielenisip ketkendigin túsindirdi, dep habarlaidy "Ult aqparat".
«Biyl áleýmettik máselerdiń ýshyǵý sebebi eń aldymen qazirgi ýaqytta dúnie júzinde oryn alyp jatqan baǵanyń ósýi syndy máselelerge bailanysty boldy. Ekinshiden, ózderińiz biletindei, Elbasynyń tapsyrmasyna sáikes 1 sáýirden bastap ataýly áleýmettik kómektiń mólsheri kóbeidi. Soǵan durys qujat jinalmady, tabystar durys kórsetilmedi. Sonyń saldarynan 79 myńǵa jýyq qazaqstandyq tabystaryn durys kórsetpei zańsyz ataýly áleýmettik kómek aldy. Jalpy, barlyǵy alǵysy kelgenimen, olai bolmaidy. Atynyń ózi ataýly áleýmettik kómek dep tur. Ol ár otbasy múshesiniń tabysyna bailanysty tólenýi tiis», - dedi vitse-premer.
Sonymen qatar ol Nur-Sultan qalasynda oryn alǵan keibir jaittarǵa da toqtalyp ótti.
«Keshe elorda turǵyndarymen kezdesken kezde turǵyn úimen qamtamasyz etýge qatysty suraqtar boldy. Barlyǵy kezekte turmai-aq baspanaly bolǵysy keledi. Olai bolmaidy. Biz quqyqtyq memlekette turǵannan keiin barlyǵy zańǵa sáikes bolýy tiis. Zań sáikes baspanany kezekke bailanysty alýy kerek. Biraq, keibir otbasylarǵa berilgen jeńildekter bar. Sol jeńildiktermen alýy qajet. Mine, osyndai máselelerge orai jaǵdailar boldy. Olardyń barlyǵyn jeke-jeke taldap, tiisti sharalar qabyldadyq», - dedi Berdibek Saparbaev.
Vitse-premer Úkimet músheleri osy máselelerdi halyqqa jete túsindirý maqsatynda elimizdiń barlyq óńirlerin 2 retten aralap, halyqpen kezdesýler ótkizgendigin aitty.
«Kóktemde 270, qazir 300-dei, jalpy 500-den astam kezdesý ótkizdik. Sondaǵy maqsatymyz - osynyń barlyǵyn túsindirý, aitý. Eń úlken máseleniń biri - jerlesterimizdiń zańdy, keibir memlekettik baǵdarlamalardy bilmeýi, qalai nesie alyp, jumysqa qalai ornalasý kerektigin túsinbeýi, ol úshin qai jerge qaryp, nendei qujat tapsyrý kerektigin bilmeýi. Negizgi sebepteri osylar», - dedi ol.
