Elimizdiń sharýalary egis alqaptaryn qurǵaqshylyqtan saqtandyra alady. Ony úiden shyqpai-aq Qoldau.kz portaly arqyly jasaýǵa bolady. Al saqtandyrý qunynyń jartysyn memleket tóleidi, dep habarlaidy "Ult aqparat".
QR Aýyl sharýashylyǵy ministrliginen málim etkendei, ótken jyly bastalǵan onlain-saqtandyrý jaqsy nátije kórsetip otyr: fermerlerge 535 mln teńgeniń saqtandyrý tólemi berildi. Bul rette, saqtandyrý jaǵdaiy týyndaǵany jóninde komissiia músheleri emes, spýtniktik málimetterge negizdelgen aqparattyq júie anyqtaǵan. Bul, saqtandyrý tólemi mehanizminiń obektivtiligi men ashyqtyǵyn qamtamasyz etti.
«Biyl agrosaqtandyrý shyǵyndaryn sýbsidiialaýǵa 3,3 mlrd teńge bólý josparlanyp otyr.
Agrosaqtandyrý salasyndaǵy operator - «QazAgro» Ulttyq basqarýshy holdingi» AQ-nyń enshiles kompaniiasy Aýyl sharýashylyǵyn qarjylai qoldaý qory. Memleket operator arqyly aýyl sharýashylyǵy taýaryn óndirýshilerge saqtandyrý syiaqysyn tóleýge arnalǵan shyǵyndardyń bir bóligin óteidi.
Barlyq saqtandyrý protsesi «Agroinsurance» servistik júiesi ornalasqan Qoldau.kz platformasynda iske asyrylady», - dedi ministrlikten.
Saqtandyrýǵa dándi daqyldar (bidai, arpa, júgeri, suly) jáne maily daqyldar (kúnbaǵys, raps, zyǵyr) jatady. Egis alqaptaryn Aqmola, Aqtóbe, Batys Qazaqstan, Qaraǵandy, Qostanai, Pavlodar, Soltústik Qazaqstan, Shyǵys Qazaqstan oblystarynyń sharýalary saqtandyra alady.
Egis alqabyn saqtandyrý úshin sharýa:
· elektrondy tsifrlyq qoltańba arqyly saitqa tirkeledi;
· jeke kabinetke kiredi;
· tizimnen saqtandyrylýy tiis egis alqabyn tańdaidy;
saqtandyrý kompaniiasyn tańdaidy (Jýsan Garant, Viktoriia, Nomad Insurance);
· saqtandyrý qunynyń 50% tóleidi.
«Osy qarapaiym protsedýralardan keiin fermer kún saiyn jeke kabineti arqyly topyraqtaǵy ylǵal deńgeiin baqylaýǵa múmkindik alady. Ol úshin únemi onlainda bolýdyń qajeti joq. Eger júie ylǵal jetispeýshiligin nemese artyq mólsherin tirkese, fermer elektrondy poshtaǵa habarlama ala alady. Osydan keiin elektrondy tsifrlyq qoltańba arqyly tólem ótinishine qol qoiýy kerek.
Barlyq protsess avtomattandyrylǵan jáne saqtandyrý shartyna sáikes saqtandyrý jaǵdaiy tirkelgen sátten bastap 15 jumys kún ishinde tólem jasalady», - dep naqtylady vedomstvodan.
