Qazaqstanda shegirtke ziiankesterin anyqtaý maqsatynda tekserý jumysy bastaldy. Bul týraly QR AShM Agroónerkásiptik keshendegi memlekettik inspektsiia komitetinen málim etti, dep habarlaidy "Ult aqparat".
«Biyl shegirtke oshaqtaryn anyqtaý úshin GPS navigatorlardy paidalana otyryp, 524 avtokólik pen 1230 tekserýshini jumyldyrý arqyly shamamen 38 mln gektar jerdi tekserý josparlanǵan. Sondai-aq, shekaralas Resei, Qytai jáne Ózbekstan memleketterimen birlesken zertteýler júrgizý kózdelgen. Qazirgi ýaqytta elimizdiń ońtústik óńirlerinde tekserý jumystary bastaldy. Kóktemgi tekserý – qystap shyqqan shegirtkelerdiń jai-kúiin anyqtaýǵa jáne himiialyq óńdeý júrgizý úshin jaǵdaidy boljaýǵa múmkindik beredi», - dep atap ótedi komitetten.
Vedomstvo málimetinshe, biyl respýblika boiynsha shegirtke ziiankesteriniń 640 myń gektar alqapta taralýy boljanyp otyr. Shegirtkemen kúreske respýblikalyq biýdjetten shamamen 2 milliard teńge qarastyrylǵan. Bul qarajatqa jetkilikti pestitsidter men himiialyq óńdeý qyzmetteri satyp alyndy. Sonymen qatar, ortalyq qoimada qosymsha pestitsidterdiń qajetti qory bar. Óńdeý jumystaryna 183 arnaiy tehnika (150 jer ústi búrikkishi, 12 ushaq, 13 asa jeńil áýekemeleri jáne 8 birlik aerozoldi gaz generatorlary) tartý josparlanǵan.
Óńirlerde himiialyq óńdeý shegirtke ziiankesteriniń taralý oshaqtary anyqtalýyna qarai bastalady. Ol úshin QR AShM Agroónerkásiptik keshendegi memlekettik inspektsiia komiteti oblystyq ákimdiktermen birlesip monitoring jáne himiialyq óńdeý jumystarynyń josparyn bekitken.
