Jańa oqý jylynan bastap 3, 6, 8-shi klastar mazmuny jańartylǵan baǵdarlamamen oqi bastaidy degen ministr Erlan Saǵadiev biylǵy jyly da kestege sáikes jańartylǵan mazmunǵa kóshý jumystary jalǵasa beretinin aitty, dep habarlaidy Baq.kz aqparat agenttigi.
Onyń aitýyna qaraǵanda, ótken jyly orta bilimge kóp kóńil bólingen.
"4, 9, 10-shy klastarda aprobatsiia bastalady. Kezeń-kezeńimen kóship otyrmyz. Muǵalimder daiyn. Oqýlyqtar daiyn. Qazirgi kúni Respýblika boiynsha oqýlyqtardy mektepterge jetkizý 99,4%-dy qurady. Oqýlyqtardyń sapasyn jaqsartý úshin kóp jumys jasaldy. Biyl oqýlyqtardyń sapasy joǵary bolady dep senemiz. Oqýlyqtardyń elektrondyq nusqalary engizildi" - deidi ministr.
Sonymen qatar, ol biylǵy jyly 1-11 synyptarǵa arnalǵan jańa memlekettik bilim berý standarttary, jańa tiptik oqý josparlary men oqý baǵdarlamalary bekitilgenin aitty.
"Endi tek qana bir tiptik oqý jospary bolmaidy, birneshe TÝP-tardy daiyndap bekittik. Mektep ózine keletin jospar boiynsha jumys jasaýyna múmkindik berdik. Barlyq mektepterge osy TÝP-tar arqyly akademiialyq derbestik berýdi durys dep esepteimiz. Bul jerde ár mekteptiń bilýi qajet másele – qai TÝP-pen jumys isteitinin mektep ózi sheshedi. Jalpy mekteptermen qatar gimnaziia, litseiler, daryndy balalarǵa arnalǵan mektepter úshin de, keshki mektep úshin de oqý josparlary muǵalimder usynysy eskerilip jasaldy" - deidi ol.
Onyń aitýynsha, Elbasynyń baǵdarlamalyq maqalasyna orai jańa kýrs oqytylatyn bolady.
«Rýhani jańǵyrý» baǵdarlamasy aiasynda 5-7-shi klastarda «Ólketaný» kýrsy biyl alǵash ret engiziledi. Oqýlyqtar mazmunyn óńirlerde qurylǵan avtorlyq toptarmen birge jasadyq. Búgingi kúni oqýlyqtar daiyn" - deidi Erlan Saǵadiev.
