Biyl 1 jeltoqsandaǵy jaǵdai boiynsha 1215 adam óndiristik jaraqat alyp, onyń 148-i qaza bolǵan. Bul týraly QR Kásipodaqtar federatsiiasynyń tóraǵasy Eraly Toǵjanov aitty, dep habarlaidy QazAqparat.
«Qolymyzdaǵy búgingi málimet boiynsha, 60%-dan astam jaǵdaida óndiristik jaraqat alýǵa jumys berýshiler kináli bolyp shyqqan. Jalpy, jumys berýshi emes, jumysshynyń ózi kináli jaǵdailar da bar. Belgilengen tártipti saqtaý kerek», - deidi Eraly Toǵjanov Ortalyq kommýnikatsiialar qyzmetinde ótken brifingte.
Sondai-aq, ol búginde kásipodaqtardyń bastamasymen barlyq óńirde «Qaýipsiz eńbek» jergilikti baǵdarlamasy júzege asyrylyp jatqanyn aitty.
«Osy joba arqyly óndiristik jaraqat alýdyń aldyn alyp, qadaǵalaýdy kúsheitý kerek. Tehnikalyq inspektordan bólek Qoǵamdyq keńester bar. Kei kásiporyndarda Qoǵamdyq keńes qaǵaz júzinde ǵana jumys isteidi. Qazir sonyń túbine jetip, Qoǵamdyq keńes kerek ekenin jumys berýshilerge túsindirýimiz kerek», - deidi ol.
Tóraǵanyń aitýynsha, respýblika boiynsha kásiporyndarda 15 myń eńbek qaýipsizdigi jáne eńbekti qorǵaý jónindegi óndiristik keńester jumys isteidi. Olardyń 95%-dan astamy kásipodaqtardyń bastamasymen qurylǵan. Sonymen qatar, 18 810 tehnikalyq inspektorlar osy másele boiynsha qoǵamdyq baqylaýdy júzege asyryp jatyr.
