Biyl ulttyq qaýipsizdik organdary 12 jasyryn esirtki zerthanasynyń áreketin toqtatty. Bul týraly QR Ulttyq qaýipsizdik komiteti baspasóz qyzmetinen málim boldy, dep habarlaidy "Ult aqparat".
Álemdegi esirtki biznesi úshin esirtkini óndirý ornynan jan-jaqqa tasymaldaý mańyzdy bolyp otyr. Geografiialyq ornalasýy, tranzittik múmkindikter, sondai-aq shekaralyq shektesý jeriniń uzaqtyǵy Qazaqstan aýmaǵyn transulttyq esirtki qurylymdary úshin tartymdy etip tur. Osy oraida olar aýǵandyq esirtkini el aýmaǵy arqyly kontrabandalyq ótkizý turǵysynda qarastyrady.
Ortalyq Aziia, onyń ishinde Qazaqstan arqyly aýǵan esirtki trafiginiń «soltústik baǵdary» ótip jatyr. 90-shy jyldardyń basynda qurylǵan bul baǵdar Reseige ótip, ary qarai Eýropoǵa qarai jalǵasady. Sonymen qatar, Qazaqstanda esirtki jaǵdaiyna áser etetin taǵy bir faktor elimizdiń ońtústiginde kannabis tobyndaǵy esirtkini óndirýge de qatysty bolyp tur.
Qazirgi ýaqytta qazaqstandyq jastar arasynda sintetikalyq esirtki túrleriniń taralýy qoǵam úshin qaýip tóndirip, eleýli problemaǵa ainalýda. Iri qalalarda sintetikalyq esirtkini ótkizý jaǵdaiy artyp keledi.
«Biyl ulttyq qaýipsizdik organdary Nur-Sultan, Almaty qalalarynda, sondai-aq Aqmola, Pavlodar jáne Batys Qazaqstan oblystarynda 12 jasyryn esirtki zerthanasynyń áreketin toqtatty. Jalpy, zańsyz ainalymnan 145 keliden astam sintetikalyq sipattaǵy esirtki men 2,5 tonna himiialyq prekýrsor tárkilendi», - delingen taratylǵan málimette.
Óndirilgen esirtki iri partiialarda kóleńkeli segmentinde áreket etetin esirtki dúkenderiniń ókilderine ótkizilip otyrǵan. Sonymen birge, esirtki úshin aqy elektrondy tólem júiesi arqyly qabyldanǵan.
