Biyl elimizde 10 sý qoimasy qalpyna keltiriledi. Bul týraly búgin Úkimet otyrysynda QR Ekologiia, geologiia jáne tabiǵi resýrstar ministri Maǵzum Myrzaǵaliev aitty, dep habarlaidy "Ult aqparat".
«Búgingi kúni 41 apatty sý qoimasyn qalpyna keltirý boiynsha jumys jalǵasýda. Onyń 11-i qalpyna keltirildi. Sonyń nátijesinde 14 myńnan astam turǵyny bar 15 eldi mekende sý basý qaýpi joiyldy. Biyl taǵy 10 sý qoimasyn qalpyna keltirý josparlanýda. Qalǵan 20 sý qoimasyna qatysty jumystar aldaǵy 3 jyldyń ishinde aiaqtalady. Búginde osy nysandar sý jinaǵysh retinde emes, sý ótkizgish retinde qoldanylyp otyrǵandyqtan, sý tasqyny kezinde qaýip tóndirmeitindigin atap ótkim keledi», - dedi ol.
Jalpy, onyń dereginshe, aldyn ala boljam boiynsha, biyl ózenderdiń sýlylyǵy qalypty deńgeide ne odan tómen dep kútilýde.
«Respýblikalyq menshik nysandaryndaǵy sý sharýashylyǵynyń jaǵdaiy ministrliktiń turaqty baqylaýynda. Bul rette, kommýnaldyq menshiktegi gidrotehnikalyq qurylystardyń jai-kúiine oblys ákimderiniń nazaryn aýdarý qajet dep sanaimyz», - dedi Maǵzum Myrzaǵaliev.
