Biylǵy jyldyń birinshi shildesinen bastap 14 myńǵa jýyq otbasy jańa járdemaqy alady. Bul týraly búgin májilistiń jalpy otyrysynda QR Eńbek jáne halyqty áleýmettik qorǵaý ministri Mádina Ábilqasymova aitty, dep habarlaidy Sputnik Qazaqstan tilshisi.
"Balaly otbasylarǵa beriletin memlekettik járdemaqylar týraly" zańǵa birinshi toptaǵy múgedekke bala kezinen kútim jasaityn 18 jastan asqan adamdarǵa arnalǵan jańa járdemaqyny engizý normalary bekitildi", — dedi Ábilqasymova.
Bul járdemaqyny 2018 jyldyń 1 shildesinen bastap 14 myńǵa jýyq otbasy alady, al onyń kólemi biylǵy jyly eń tómengi kúnkóris deńgeiiniń 1,05 mólsherin nemese 29 699 teńgeni quraidy. Memlekettik járdemaqy olarǵa ómir boiy tólenedi. Mańyzdysy — áieldiń múgedek balasyna kútim jasaǵan jyldary zeinetke shyqqanda eńbek ótiline qosylady. Bul maqsatqa respýblikalyq biýdjetten 2,7 milliard teńge qarastyrylyp otyr.
Aita ketsek, búgingi tańda bala kezden birinshi toptaǵy múgedek adamdarǵa beriletin memlekettik áleýmettik járdemaqynyń mólsheri — 54 306 teńge.
Budan bólek, ministrdiń aitýynsha, "Arnaýly áleýmettik qyzmetter týraly" zańǵa engiziletin túzetýler áleýmettik qyzmet kórsetýge tek qana memlekettiń emes, sonymen qatar azamattardyń, otbasy músheleriniń, jeke sektordyń jáne úkimettik emes uiymdardyń birdei qatysýyn qamtamasyz etýge múmkindik beredi. Osy maqsatta áleýmettik qyzmetkerlerge arnalǵan jańa biliktilik talaptary, meditsinalyq standarttar men meditsinalyq mekemelerdiń standartty erejeleri talap etiledi.
