Qyrǵyzstanda parlament sailaýynyń qorytyndysymen kelispegen partiia ókilderi 5 qazanda kúndiz Bishkekte miting ótkizdi.
Qyrǵyzstan parlamenti ǵimaratynyń mańyna jinalǵandarǵa ózderin "Sáýir revoliýtsiiasynyń qaharmandary" dep ataǵan top shara ótkizýine kedergi jasady. Olar "munda qan tógilgen, bul qasietti jer, mundai oryndy saiasatkerlerdiń óz múddesine paidalanýyna jol bermeimiz" desti. Taraptar daýlasyp qalǵan soń jinalǵandar alańǵa qarai jyljydy.
Mitingini sailaý qorytyndysymen kelispegen bes partiia ótkizip otyr. Osyǵan deiin "Reforma", "Meken Yntymagy", "Chon Kazat", "Yiman Nýrý" jáne "Ordo" partiialarynyń ortaq rezoliýtsiiaǵa qol qoiǵany da habarlanǵan edi.
4 qazanda Qyrǵyzstanda parlament sailaýy ótken. Sailaý ýchaskeleri tańerteńgi saǵat 8-de ashylyp, keshki 8-ge deiin jumys istegen. Parlamenttegi 120 orynǵa 16 partiiadan 2 myńǵa jýyq kandidat talasqan.
5 qazan tańerteńgi saǵat 9-daǵy aqparat boiynsha, biýlleten jáshikterin avtomatty túrde sanaityn jáshikterdiń 98 paiyzynan málimet túsken. Sailaýǵa sailaýshylardyń 56,5 paiyzy qatysqan.
Aldyn ala málimet boiynsha, parlamentke tórt partiia ótedi:
- "Birimdik" — 24,5%;
- "Mekenim Kyrgyzstan" — 23,88%;
- "Kyrgyzstan" — 8,76%;
- "Býtýn Kyrgyzstan" — 7,13%.
Birinshi atalǵan úsh partiiany sarapshylar qazirgi prezident Sooronbai Jeenbekovke jaqyn saiasi uiym dep sanaidy.
