Qyrǵyzstanda ótken táýlikte 245 adamnan koronavirýs infektsiiasy anyqtaldy. Bishkekte bir kúnde 77 naýqas tirkelgen. Bul - 13 tamyzdan bergi eń joǵary kórsetkish.
Qyrǵyzstan densaýlyq saqtaý ministri Sabyrjan Abdikarimov beisenbi kúngi brifing kezinde "profilaktika sharttaryn jappai saqtamaǵandyqtan" virýs jyldam tarap jatyr dep málimdedi. Ol Bishkekte epidemiologiialyq ahýal nasharlaýy múmkin ekenin aitty.
"Eger jurt qarapaiym sanitarlyq talaptardy oryndamasa, Bishkektiń "densaýlyq saqtaý salasy taǵy kollapsqa ushyraýy múmkin" deidi ol.
Resmi málimet boiynsha, elde koronavirýs juqtyrǵandar 48 342 adamǵa jetken: 43 957 adam jazylǵan, 1073 adam qaitys bolǵan. 18 tamyzda densaýlyq saqtaý ministrligi Covid statistikasyn qaita qarap, sonyń saldarynan 500-ge jýyq naýqastyń ólimi resmi esepten alynyp tastalǵan. Ministrlik olardyń koronavirýstan emes, "ilespe aýrýlardan kóz jumǵanyn" habarlady.
Kórshi memleketterde "epidemiologiialyq ahýal nasharlaǵan tusta" Qazaqstan biligi jaqynda baqylaý-ótkizý pýnkterindegi baqylaýdy kúsheitý qajettigin aitqan. Atap aitqanda, áýejailar men temir jol vokzaldarynda baqylaýdy qataitý máselesi qozǵalǵan.
Qyrǵyzstan shilde aiynan beri koronavirýsqa uqsas pnevmoniia esebin Covid-pen biriktirip, jariialap keledi. Qazaqstan biligi jaz ailarynda koronavirýs statistikasyna pnevmoniiany qosatynyn aitqanmen keiinirek bul oiynan ainyp qaldy.
