قىرعىزستاندا ٶتكەن تەۋلٸكتە 245 ادامنان كوروناۆيرۋس ينفەكتسيياسى انىقتالدى. بٸشكەكتە بٸر كٷندە 77 ناۋقاس تٸركەلگەن. بۇل - 13 تامىزدان بەرگٸ ەڭ جوعارى كٶرسەتكٸش.
قىرعىزستان دەنساۋلىق ساقتاۋ مينيسترٸ سابىرجان ابديكاريموۆ بەيسەنبٸ كٷنگٸ بريفينگ كەزٸندە "پروفيلاكتيكا شارتتارىن جاپپاي ساقتاماعاندىقتان" ۆيرۋس جىلدام تاراپ جاتىر دەپ مەلٸمدەدٸ. ول بٸشكەكتە ەپيدەميولوگييالىق احۋال ناشارلاۋى مٷمكٸن ەكەنٸن ايتتى.
"ەگەر جۇرت قاراپايىم سانيتارلىق تالاپتاردى ورىنداماسا, بٸشكەكتٸڭ "دەنساۋلىق ساقتاۋ سالاسى تاعى كوللاپسقا ۇشىراۋى مٷمكٸن" دەيدٸ ول.
رەسمي مەلٸمەت بويىنشا, ەلدە كوروناۆيرۋس جۇقتىرعاندار 48 342 ادامعا جەتكەن: 43 957 ادام جازىلعان, 1073 ادام قايتىس بولعان. 18 تامىزدا دەنساۋلىق ساقتاۋ مينيسترلٸگٸ Covid ستاتيستيكاسىن قايتا قاراپ, سونىڭ سالدارىنان 500-گە جۋىق ناۋقاستىڭ ٶلٸمٸ رەسمي ەسەپتەن الىنىپ تاستالعان. مينيسترلٸك ولاردىڭ كوروناۆيرۋستان ەمەس, "ٸلەسپە اۋرۋلاردان كٶز جۇمعانىن" حابارلادى.
كٶرشٸ مەملەكەتتەردە "ەپيدەميولوگييالىق احۋال ناشارلاعان تۇستا" قازاقستان بيلٸگٸ جاقىندا باقىلاۋ-ٶتكٸزۋ پۋنكتەرٸندەگٸ باقىلاۋدى كٷشەيتۋ قاجەتتٸگٸن ايتقان. اتاپ ايتقاندا, ەۋەجايلار مەن تەمٸر جول ۆوكزالدارىندا باقىلاۋدى قاتايتۋ مەسەلەسٸ قوزعالعان.
قىرعىزستان شٸلدە ايىنان بەرٸ كوروناۆيرۋسقا ۇقساس پنەۆمونييا ەسەبٸن Covid-پەن بٸرٸكتٸرٸپ, جارييالاپ كەلەدٸ. قازاقستان بيلٸگٸ جاز ايلارىندا كوروناۆيرۋس ستاتيستيكاسىنا پنەۆمونييانى قوساتىنىن ايتقانمەن كەيٸنٸرەك بۇل ويىنان اينىپ قالدى.
