Qyrǵyzstan syrtqy ister ministrligi Bishkektegi Qazaqstannyń ýaqytsha senim júktelgen ókili Jánibek Káripjanovty shaqyrtyp, nota tapsyrǵan, - dep habarlaidy Azattyqtyń Qyrǵyz qyzmeti.
Bishkek osynyń qarsańynda Qazaqstan prezidenti Nursultan Nazarbaevtyń Qyrǵyzstan prezidenttigine kandidattardyń birimen kezdesip, aldaǵy sailaý týraly aitqan sózi túsinispeýshilik týdyrǵanyn jetkizgen.
"Dostyq qatynastaǵy Qazaqstan basshysynyń Qyrǵyzstannyń ishki isine aralaspaityny týraly málimdemesine qaramastan, onyń sózi Qazaqstan tarabynyń bolashaq prezidentke qatysty basymdyǵyn aiqyn bildiredi. Osylaisha, qyrǵyz taraby atalǵan sózdi, sonymen birge Qazaqstan jaǵynyń bul kezdesý jaily keńinen jariialaýyn Qyrǵyzstan halqynyń tańdaýyna yqpal etýge jáne Qyrǵyzstannyń ishki isine aralasýǵa tyrysý dep baǵalaidy", - delingen notada.
Qyrkúiektiń 19-y kúni Qazaqstan prezidentiniń resmi saity Nazarbaevtyń Almatyda Qyrǵyz prezidenttigine kandidat, Qyrǵyzstan parlamentindegi "Respýblika – Ata Jurt" fraktsiiasynyń jetekshisi Ómirbek Babanovpen kezdeskeni týraly aqparat jariialaǵan. Resmi habarlamada kezdesýdiń qashan bolǵany kórsetilmegen.
Nazarbaevtyń kandidat Babanovpen kezdesýine qatysty Qyrǵyzstannyń ortalyq sailaý komissiiasynyń ókili Abdyjapar Bekmatov seisenbi kúni Azattyqqa "komissiia ol kezdesýdiń sailaýaldy úgit-nasihatpen bailanysy bar-joǵyn zerttegen soń baǵasyn beredi" dep habarlaǵan.
Qyrǵyzstanda biyl qazannyń 15-i kúnin ótetin prezident sailaýyna resmi tirkelgen 13 kandidat bar.
