10 jylǵa bas bostandyǵynan aiyrylǵan QR UEM burynǵy ministri Qýandyq Bishimbaevtyń Aqmola oblysynyń Qosshy aýylyndaǵy kottedji mádeniet úiine ainalady, dep habarlaidy "QazAqparat" Tselinograd aýdany ákimdigine silteme jasap.
Ákimdiktiń málimeti boiynsha Astananyń irgesindegi Qosshy aýylynda eks-ministr Qýandyq Bishimbaevtyń ańshy úiiniń aýmaǵy 500 sharshy metr. Bul kottedjde úlken holl, úsh jatyn bólme, monsha jáne ashyq bassein bar.
Astana qalasy qylmystyq ister boiynsha mamandandyrylǵan aýdanaralyq sotynyń sheshimine sáikes Tselinograd aýdany ákimdiginiń 2018 jyldyń 7 qyrkúiektegi qaýlysymen atalmysh nysan aýdandyq mádeniet úiininiń balansyna berilgen.
«Qazirgi kezde, kottedjdi mádeniet úi retinde qaita jabdyqtaý jumystary júgizilýde. Jaqynda ishin jinastyryp, tazaladyq. Mádeniet úiine qajetti quraldarmen jabdyqtalýda. Jyl sońyna deiin nysandy paidalanýǵa beretin bolamyz. Onda 20 adam jumys istep, 10 úiirme uiymdastyrý josparlanǵan. Bul Qosshy aýylyndaǵy alǵashqy mádeniet úii bolady», - dep túsindirdi Tselinograd aýdandyq mádeniet jáne tilderdi damytý bóliminiń basshysy Aigúl Súiinjanova QazAqparat tilshisiniń saýalyna.
Eske sala keteiik, 2018 jylǵy 14 naýryzynda Astana qalasy qylmystyq ister boiynsha mamandandyrylǵan aýdanaralyq sotynyń úkimimen burynǵy Ulttyq ekonomika ministri Qýandyq Bishimbaev múlkiniń tárkilenýimen 10 jylǵa sottalǵan bolatyn.
