Foto: ©️ Tengrinews.kz / Turar Qazanǵapov
Májilis depýtaty, zańger Abzal Quspan Ádilet ministrligi uiymdastyrǵan halyqaralyq konferentsiia aldynda BAQ ókilderine eks-sheneýnik Qýandyq Bishimbaevtyń isi týraly pikir bildirdi, dep habarlaidy Kazinform.
«Keiingi kezde raqymshylyq arqyly bosap shyqqan adamdar óreskel qylmystar jasap jatyr. Májilis depýtaty retinde raqymshylyq tetikterin jetildirý baǵytynda jumys istep jatyrsyzdar ma?» dep surady jýrnalist.
Depýtattyń aitýynsha, Bishimbaevqa jasalǵan raqymshylyq — «eski Qazaqstannyń» atribýty.
«Bul máseleniń jalpy sipatyna nazar aýdartqym keledi. Biz myna qylmystyq zańnamany jan-jaqtan julqylap, neshe túrli ózgerister men tolyqtyrýlar engizip, neshe túrli eksperiment jasap, oiynshyqqa ainaldyryp jiberdik. Sonaý orta ǵasyrlardan beri kele jatqan ustanym bar. Zańnyń isine saiasatkerler aralassa, zańnyń eshqandai salmaǵy, máni men maǵynasy qalmaidy. Bishimbaevqa qatysty siz aityp otyrǵan máseleniń raqymshylyqqa eshqandai qatysy joq. Ol kezdegi "eski Qazaqstanda" prezidenttiń janynda aqtaityn arnaiy komissiia boldy. Iaǵni, ol sottan da, basqadan da joǵary turatyn organ siiaqty edi. Sot óz úkimin shyǵaryp, 10 jylǵa bas bostandyǵynan aiyrǵan. Meniń bilýimshe, sol úkim kúshine enip, jazasyn ótep jatqan kezde prezident janyndaǵy komissiianyń sheshimi boiynsha Prezident tarapynan raqymshylyq jariialanyp, bosap shyqqan bolatyn. Iaǵni ol jerde eshqandai sot bolmaidy, prokýror qatyspaidy, advokattar qatyspaidy, sot jaryssózi bolmaidy degen siiaqty. Bir ǵana adamnyń sheshimi. Onyń arty endi qandai saldarǵa ákep soqqanyn ózderińiz kórip otyrsyzdar», — deidi depýtat.
Zańger qazir prezident janynda ondai komissiia jumys istemeitinin de atap ótti.
«Meniń bilýimshe, qazirgi tańda ondai komissiia joq. Prezident te, basqa da sottyń isine aralaspaidy. Biraq endigi máselemiz — qylmystyq zańnamany bir izge salý. Ol týraly Prezident byltyrǵy Joldaýynda aitty. Qazir Májiliste qoldanystaǵy Qylmystyq-protsessýaldyq kodeks pen Qylmystyq atqarý týraly kodeksti ońtailandyrý jáne ony turaqtandyrý týraly zań qaralyp jatyr», — dedi Abzal Quspan.
