Astana burynǵy ulttyq ekonomika ministri Qýandyq Bishimbaev pen jemqorlyq qylmysyna qatysy bar 22 figýrantqa qatysty sot otyrysy ótip jatyr, - dep habarlaidy Tengrinews.kz tilshisi.
Sottalýshy Qýandyq Bishimbaev osymen úshinshi kún sot aldynda jaýap berip jatyr.
Sot barysynda eks-ministr óziniń sońǵy 7 jyldaǵy tabysy men shyǵyny jaily aitty.
"Maǵan ózimniń tabysym jaily málimetterdi jariialaýǵa ruqsat berińiz. Jáne maǵan 120 myń dollar bere aldym ba, joq pa sol suraqqa jaýap berýge ruqsat berińiz", - dedi Bishimbaev sýdiaǵa.
Sottalýshy qylmystyq is materialdarynda osy málimetterdiń kórsetilgenin aityp ótti.
"Onda meniń bankterdegi esepshottarymnyń bar ekeni aitylady. 2010-2017 jyldar aralyǵynda shotqa 273 million 638 myń 328 teńge túsken. Bul somany eski baǵam boiynsha sanasaq, shamamen eki million dollar. Osy ýaqyt aralyǵyndaǵy shyǵyn kólemi - 262 million teńge. Olardyń 95 million teńgesi depozitke aýdaryldy. 42 million teńge qolma-qol sheshilgen. Sondyqtan meniń kottedj qurylysyna 120 myń dollar aqsha aýdarǵanym múmkin emes. Aqshalarǵa qatysty málimet myna jerde de kórsetilgen", - dedi Qýandyq Bishimbaev.
Al keshe, 9 qańtarda ótken sot otyrysynda sottalýshy Qýandyq Bishimbaevqa arnalyp salynyp jatyr delingen Qosshydaǵy úi men "Prianik" meiramhanasynyń kimge tiesili ekeni jaily tolyq aityp bergen bolatyn.
Munyń aldynda eks-ministr Memleket basshysynan keshirim suraǵan edi. "Prezidenttiń aldynda kináli ekenimidi bilemin. Men tanityn adamdar, men ózim jumysqa shaqyrǵan Jaqsybaev, Jaqypov jáne taǵy basqalar maǵan nuqsan keltirdi, men olar úshin Memleket basshysy aldynda jaýaptymyn. Osy jaǵdai úshin jáne Prezidenttiń senimin aqtai almaǵanym úshin uialamyn. Kadrlardy tańdaý kezinde qatty qatelestim. Meniń senimime kirip, meni tek qoldanǵan adamdardy ózime jaqyndattym. Memleket basshysynan keshirip suraimyn, halyqtan osy úshin keshirim suraimyn", - degen edi Bishimbaev.
Sondai-aq, osyǵan deiin sotta Bishimbaevtyń áieli de sóz sóilegen edi. "(...) QR QPK-nyń 120-babynyń 1-taraýyn nazarǵa alyp, jýrnalistik tergeý resmi qujat retinde moiyndalý kerek. Al 125-bap boiynsha qylmystyq isti sheshý úshin dálelerdi baǵalaý qatystylyq, dáleldilik tusynan baǵalaný kerek. Osyǵan bailanysty zaýyt qurylysy týraly maqalalardy iske qosýyńyzdy suraimyn", - degen edi Bishimbaevtyń áieli sot zalynda.
2016 jyldyń 30 jeltoqsanynda ulttyq ekonomika eks-ministri Qýandyq Bishimbaevqa qatysty tergeý sharalary júrip jatqany belgili bolǵan edi. QR SIM basshylyq quramymen kezdesýinde Nursultan Nazarbaev Qýandyq Bishimbaevtyń qyzmetten bosatylǵanyn málimdegen bolatyn.
