QR IIM Qylmystyq atqarý júiesi komiteti burynǵy ulttyq ekonomika ministri Qýandyq Bishimbaevtiń bostandyqqa shyǵýyn túsindirdi, dep habarlaidy "Ult aqparat".
«2019 jyldyń 25 qyrkúieginde Shymkent qalasy Abai aýdandyq soty Q. Bishimbaevty merziminen buryn shartty túrde bosatý týraly ótinishhatty qarady jáne qanaǵattandyrdy. Sot sheshimi 2019 jyldyń 11 qazanynda kúshine engen. Buǵan deiin Q. Bishimbaev raqymshylyq jasaýdy ótinip, Memleket basshysyna júgingen edi. 2019 jyldyń aqpanynda bul ótinish jaza merzimin qysqartý túrinde maquldanǵan», - dep habarlady QR IIM QAJ komitetiniń baspasóz qyzmeti.
Merziminen buryn shartty túrde bosatý týraly ótinishti qaraý kezinde sottalýshynyń abaqtydaǵy minez-qulqy, kinásin tolyq moiyndaýy syndy bas bostandyǵynan aiyrýdy qajet etpeitinin kórsetetin jaǵdailar eskeriledi.
«Qýandyq Bishimbaev óz aiybyn tolyq moiyndaǵan jáne ókinish bildirgen. Sot taǵaiyndaǵan ótemaqyny tólegen. Jazasyn óteý barysynda Q. Bishimbaev ózin baiypty ustaǵan jáne mádeni sharalarǵa belsene qatysqan. Jazanyń qalǵan bóligin eks-ministr probatsiialyq baqylaýda óteidi», - delingen habarlamada.
Aita keteiik, búgin Shymkent qalasynyń túrmesinde jazasyn ótep jatqan Qýandyq Bishimbaev bostandyqqa shyqty. 2019 jyly 13 aqpanda sottalýshy Qýandyq Bishimbaev Prezident jarlyǵymen raqymshylyqqa ilinip, jazasyn óteý merzimi 10 jyldan 4 jylǵa qysqarǵan. Búginde jazasynyń úshten eki bóligin ótep qoiǵan. 167/3 túzeý mekemesiniń basshylyǵy oǵan jaqsy minezdeme bergen.
Eske sala ketsek, ótken jyldyń naýryz aiynda burynǵy Ulttyq ekonomika ministri men osy iske qatysty ózge de aiyptalýshylarǵa úkim shyqqan edi. Sot úkimimen Qýandyq Bishimbaevtiń múlki tárkilenip, 10 jylǵa sottaldy. Sonymen birge, ol ómir boiyna memlekettik qyzmette jumys isteý quqyǵynan aiyryldy. Biylǵy 4 qańtar kúni Qýandyq Bishimbaev Shymkenttegi qaýipsizdigi ortasha túzeý mekemesine aýystyrylǵan bolatyn .
