Sot eks-ministr Qýandyq Bishimbaevtyń isindegi taraptarǵa áleýmettik jelide pikir bildirýge tyiym saldy, dep habarlaidy «Ult aqparat» Kazinform-ǵa silteme jasap.
Memlekettik aiyptaýshy taraptan prokýror Aijan Aimaǵanova alqabiler sotynyń pikirine áleýmettik jeli arqyly áser etý qateri bar ekenin aityp, osyndai shara qoldanýdy usynǵan bolatyn. Sot ol usynysty qabyldady.
«Protseske qatysýshylarǵa aitarym, sot otyrystarynan keiin BAQ-ta aitqan sózderińiz sotqa qysym kórsetý retinde baǵalanýy múmkin. Osyǵan bailanysty protseske qatysýshylardyń bárine ondai áreketterden aýlaq bolýǵa keńes beremin. Óz quqyqtaryńyzdy sot otyrysy ótip jatqan zalda iske asyryńyzdar. Óitkeni, sot otyrysynan tys áreketter otyrystaǵy alqabilerdiń pikirine áser etýi múmkin jáne qylmystyq isti obektivti qaraýǵa kesirin tigizýi múmkin. Osyǵan bailanysty aiyptaýshy taraptyń usynysyn qanaǵattandyrý qajet dep esepteimin», - dedi sýdia Aijan Qulbaeva.
Eske salsaq, 2023 jyly 9 qarashada Astanadaǵy «Bau» meiramhanasynda burynǵy Ulttyq ekonomika ministri Qýandyq Bishimbaev óziniń jubaiyn soqqyǵa jyqty. Áiel jedel járdem jetkenshe kóz jumdy. Munan soń Ishki ister ministrligi Qýandyq Bishimbaevtyń ustalǵanyn rastady.
Ótken jyly 15 qarashada ótken keńeste Memleket basshysy Qasym-Jomart Toqaev Ishki ister ministrine Q. Bishimbaevtiń isin erekshe baqylaýǵa alýdy tapsyrdy.
Biyl 11 qańtarda elorda soty Qýandyq Bishimbaevty kúzetpen ustaý merzimin 2 aiǵa uzartqan edi, 26 aqpanda Qýandyq Bishimbaevtyń isi sotqa tústi.
1 naýryzda Qýandyq Bishimbaevtyń isi boiynsha aldyn ala tyńdaý kúni belgilendi. 11 naýryz kúni Astananyń Qylmystyq ister jónindegi mamandandyrylǵan aýdanaralyq sotynda is boiynsha aldyn ala tyńdaý ótti. Aldyn ala tyńdaý 12 naýryzda jalǵasty.
27 naýryzda elordanyń qylmystyq ister jónindegi mamandandyrylǵan aýdanaralyq sotynda Q. Bishimbaevtyń isi boiynsha alqabilerdi irikteý ótti.
29 naýryzdaǵy sot otyrysynda marqum Saltanat Núkenovanyń aǵasy Aitbek Amangeldi kýáger retinde jaýap berip, Qýandyq Bishimbaev pen Saltanat Núkenovanyń arasyndaǵy alǵashqy urys-kerister qalai bastalǵany týraly málimetter aitty jáne marqumnyń bet-álpeti kógergen sýret kórsetti.
Búgingi sot otyrysynda aiyptalýshy Qýandyq Bishimbaev marqum S. Núkenovanyń týystarynan keshirim surady.
