"Sátti Juldyz" biryńǵai lotereia operatory Mańǵystaý oblysy Beineý aýylynyń turǵyny oiyn klýbyn órtep, isin videoǵa túsirgen oqiǵaǵa qatysty pikir bildirdi, - dep habarlaidy Tengrinews.kz tilshisi.
Kompaniia qyzmetkeri bul oqiǵany qańtardaǵy tártipsizdikter kezinde qaraqshylar men tonaýshylardyń basqynshylyq áreketimen salystyrdy. Osyndai adamdarǵa lańkes degen mártebe berilgenin eske saldy.
Biryńǵai operator qyzmetkeri qazir quqyq qorǵaý organdary er adamnyń qandai maqsaty bolǵanyn anyqtap jatqanyn aitty.
"Bul azamat aitylǵan mekenjai boiynsha 27 myń teńgege bilet satyp alyp, 2020 jyldyń 1 qarashasynda Nur-Sultan ýaqyty boiynsha saǵat 09.23-te 22 myń teńge utyp aldy. Osydan keiin oǵan qatysty satyp alý deregi tirkelmegen. Sonymen qatar, osy mekenjaiǵa qaita kelmegen", - dedi baspasóz qyzmeti ókili.
Baspasóz qyzmetiniń málimetinshe, er adamǵa órt qoiýdan basqa, operator bedeline nuqsan keltiretin aqparat taralýyna bailanysty shaǵym túsedi.
"Osyndai talap barlyq BAQ-qa jáne osy azamattyń jeńilisteri týraly negizsiz jáne dáleldenbegen málimet taratqan ózge de aqparat quraldaryna qoiylady", - dedi kompaniia ókili.
Buǵan deiin Mańǵystaý oblysy Beineý aýylynyń turǵyny loto-klýbty órtep, isin videoǵatúsirgeni habarlanǵan bolatyn.
Oqiǵanyń videosy áleýmettik jeliler men messendjerlerde paida boldy. Ózin kameraǵa túsirgen er adamnyń aitýynsha, "mundai oiyndar adamdar men jastardy qyzyqtyrady, qumarlyq - aýrý". Ol barlyq qyzmetkerden órt aldynda ǵimaratty bosatýyn suraǵanyn aitty. Óitkeni "eshkimge ziian tigizgisi kelmegen".
