Nur-Sultan qalalyq sotynyń qylmystyq ister jónindegi sot alqasy Eljan Birtanovti úiqamaqta ustaý bultartpaý sharasyn kúshinde qaldyrdy, dep habarlaidy "Ult aqparat".
Keshe ótken otyrysta memlekettik aiyptaýshy sottan burynǵy Densaýlyq saqtaý ministri Eljan Birtanovti úiqamaqta ustaý merzimin 14 shildege deiin uzartýdy suraǵan bolatyn. Prokýror Tólegen Jaraspaev kúdikti E.Birtanovti úiqamaqta ustaý merzimin 9 aiǵa deiin, iaǵni 2021 jylǵy 14 shildege deiin uzartý týraly ótinishti Qarjy monitoringi agenttigi Tergeý departamentiniń basshysy túsirgenin atai kelip, qosymsha saraptama men Densaýlyq saqtaý ministrliginiń qyzmetkerlerinen alynǵan jaýaptardy, Memlekettik aýdit departamentiniń qorytyndysyn taldaý jumystaryn 14 maýsymǵa deiin aiaqtaý múmkin emes degen ýáj aitty.
«Osynyń bárin eskerip, úiqamaq merzimin 14 shildege deiin uzartýdy jáne qanaǵattandyrýdy suraimyn», - dedi memlekettik aiyptaýshy.
Sondai-aq, ol Birtanovqa otbasy múshelerinen basqa barlyq adamdarmen telefon arqyly sóilesýge jáne úiden shyǵýǵa tyiym salý kerektigin aitty. Bul talabyn tergeý jumystarynyń merzimi 1 tamyzǵa deiin uzartylýymen bailanystyrdy. Prokýrordyń aitýynsha, kúdikti sottyń tyiymy bar ekenin bile tura, birqatar zańǵa qaishy áreketterge barǵanyn atady. Biraq sot otyrysyna BAQ ókilderi qatysyp otyrǵanyn eskerip, naqty qandai áreketter týraly sóz bolyp jatqanyn ashyp aita almaitynyn jetkizdi. Onyń sózinshe, bul tergeý áreketterin jariia etý bolmaq.
Sot protsesi barysynda qorǵaýshylar Eljan Birtanovtiń syrtynan tergeý organynyń ańdý júrgizýi zańdy ekenin rastaityn qujat joq ekenin aityp, úiqamaq merzimin ári qarai uzartpaýdy suraǵan bolatyn.
Búgin sot Eljan Birtanovti úiqamaqta ustaý merzimin 9 aiǵa deiin, iaǵni 2021 jylǵy 14 maýsymnan 14 shildege deiin uzartatynyn málim etti.
«Baiandalǵan derekterdiń negizinde, Qylmystyq is júrgizý kkodeksiniń 55, 56, 151, 152-baptaryn basshylyqqa ala otyryp, sot Eljan Amantaiuly Birtanovqa qatysty úiqamaq túrindegi bultartpaý sharasynyń merzimin 2021 jylǵy 14 maýsymnan bastap 14 shildeni qosa alǵanda esepteletin 9 aiǵa deiin uzartý týraly qaýly etti. Kúdiktiniń qorǵaýshylary men advokattarynyń ótinishteri qanaǵattandyrýsyz qaldyrylsyn», - dedi tergeý sotynyń sýdiasy Aqmaral Isaeva
Iaǵni, sot aiyptaýshy taraptyń Birtanovqa otbasy múshelerinen basqa barlyq adamdarmen telefon arqyly sóilesýge jáne úiden shyǵýǵa tyiym salý týraly ótinishin qabyldamady.
Bir ai buryn sot Eljan Birtanovti úiqamaqta ustaý sharasyn kúshinde qaldyrǵan bolatyn.
Eske salsaq, burynǵy Densaýlyq saqtaý ministri Eljan Birtanov biýdjet qarajatyn ysyrap etti degen kúdikpen qamaýǵa alynǵan edi.
