Qazaqstan densaýlyq saqtaý ministri Eljan Birtanov 8 mamyrdaǵy onlain-suhbatta “koronavirýstyń taraýyn tolyq baqylaýǵa aldyq” dep málimdedi.
8 mamyrda elde keshke deiin 216 adamnan koronavirýs tabyldy. Olardyń basym bóligi Almaty men Nur-Sultanda. Ministr virýs juqtyrǵandardyń ósýin profilaktikalyq tekseristiń kóbeigenimen bailanystyrady.
“Virýs juqtyrǵandardyń sanynyń ósýi halyq arasynda profilaktikalyq testiń kóbeigenimen bailanysty. Mysaly, búgin Almaty qalasynda virýs juqtyrǵandardyń 90 paiyzy, Nur-Sultanda virýs tabylǵandardyń 80 paiyzy profilaktikalyq skrining kezinde anyqtaldy. Iaǵni, olardyń kóbi aýyrmaǵan, simptomy joq” dedi Birtanov memlekettik Habar 24 arnasynyń efirinde.
Ministr qazir elde virýs juqtyrǵan, biraq simtomy joq adamdar úide emdelip jatqanyn aitty.
Birtanov “Qazaqstanda erte tótenshe jaǵdai jariialanbaǵanda 24 naýryz-aq elde 4500 adamǵa virýs juǵar edi” deidi. Elde koronavirýs juqtyrǵan alǵashqy adamdar 13 naýryzda anyqtalǵan. Keiin bilik 16 naýryzda elde tótenshe jaǵdai jariialap, birtindep karantin engize bastady.
Ministrliktiń esebinshe, Qazaqstanda 13 naýryzdan beri 320 myń test alynǵan mamyrdyń sońyna taman kúnine 25 myń test alý kózdelgen. Vedomstvo aldaǵy ýaqytta Qazaqstanda virýs juqtyrǵandardan góri dertten aiyqqandar kóp bolady dep úmittenedi.
Naýryzda Qazaqstan densaýlyq saqtaý ministrligi mamyrdyń sońyna deiin elde 3500 adamǵa virýs juǵady dep boljaǵan. Keiin bul esepti ózgertip, 4 myńnan astam adam dertke shaldyǵady degen. Biraq ministrlik óz boljamyn úshinshi ret ózgertip, mamyrdyń sońyna deiin 5300 adamǵa virýs juǵady dep otyr.
Qazaqstanda 11 mamyrda koronavirýsqa bailanysty jariialanǵan tótenshe jaǵdai aiaqtalýy tiis. Biraq Birtanov elde karantin sharalary birtindep alynatynyn aitady.
8 mamyr 17.00-degi málimetke sai, Qazaqstanda 4794 adamnan virýs tabyldy. 1582 adam dertten aiyqty (jumada 64 adam jazyldy). 31 adam qaitys boldy.
