قازاقستان دەنساۋلىق ساقتاۋ مينيسترٸ ەلجان بٸرتانوۆ 8 مامىرداعى ونلاين-سۇحباتتا “كوروناۆيرۋستىڭ تاراۋىن تولىق باقىلاۋعا الدىق” دەپ مەلٸمدەدٸ.
8 مامىردا ەلدە كەشكە دەيٸن 216 ادامنان كوروناۆيرۋس تابىلدى. ولاردىڭ باسىم بٶلٸگٸ الماتى مەن نۇر-سۇلتاندا. مينيستر ۆيرۋس جۇقتىرعانداردىڭ ٶسۋٸن پروفيلاكتيكالىق تەكسەرٸستٸڭ كٶبەيگەنٸمەن بايلانىستىرادى.
“ۆيرۋس جۇقتىرعانداردىڭ سانىنىڭ ٶسۋٸ حالىق اراسىندا پروفيلاكتيكالىق تەستٸڭ كٶبەيگەنٸمەن بايلانىستى. مىسالى, بٷگٸن الماتى قالاسىندا ۆيرۋس جۇقتىرعانداردىڭ 90 پايىزى, نۇر-سۇلتاندا ۆيرۋس تابىلعانداردىڭ 80 پايىزى پروفيلاكتيكالىق سكرينينگ كەزٸندە انىقتالدى. ياعني, ولاردىڭ كٶبٸ اۋىرماعان, سيمپتومى جوق” دەدٸ بٸرتانوۆ مەملەكەتتٸك حابار 24 ارناسىنىڭ ەفيرٸندە.
مينيستر قازٸر ەلدە ۆيرۋس جۇقتىرعان, بٸراق سيمتومى جوق ادامدار ٷيدە ەمدەلٸپ جاتقانىن ايتتى.
بٸرتانوۆ “قازاقستاندا ەرتە تٶتەنشە جاعداي جارييالانباعاندا 24 ناۋرىز-اق ەلدە 4500 ادامعا ۆيرۋس جۇعار ەدٸ” دەيدٸ. ەلدە كوروناۆيرۋس جۇقتىرعان العاشقى ادامدار 13 ناۋرىزدا انىقتالعان. كەيٸن بيلٸك 16 ناۋرىزدا ەلدە تٶتەنشە جاعداي جارييالاپ, بٸرتٸندەپ كارانتين ەنگٸزە باستادى.
مينيسترلٸكتٸڭ ەسەبٸنشە, قازاقستاندا 13 ناۋرىزدان بەرٸ 320 مىڭ تەست الىنعان مامىردىڭ سوڭىنا تامان كٷنٸنە 25 مىڭ تەست الۋ كٶزدەلگەن. ۆەدومستۆو الداعى ۋاقىتتا قازاقستاندا ۆيرۋس جۇقتىرعانداردان گٶرٸ دەرتتەن ايىققاندار كٶپ بولادى دەپ ٷمٸتتەنەدٸ.
ناۋرىزدا قازاقستان دەنساۋلىق ساقتاۋ مينيسترلٸگٸ مامىردىڭ سوڭىنا دەيٸن ەلدە 3500 ادامعا ۆيرۋس جۇعادى دەپ بولجاعان. كەيٸن بۇل ەسەپتٸ ٶزگەرتٸپ, 4 مىڭنان استام ادام دەرتكە شالدىعادى دەگەن. بٸراق مينيسترلٸك ٶز بولجامىن ٷشٸنشٸ رەت ٶزگەرتٸپ, مامىردىڭ سوڭىنا دەيٸن 5300 ادامعا ۆيرۋس جۇعادى دەپ وتىر.
قازاقستاندا 11 مامىردا كوروناۆيرۋسقا بايلانىستى جارييالانعان تٶتەنشە جاعداي اياقتالۋى تيٸس. بٸراق بٸرتانوۆ ەلدە كارانتين شارالارى بٸرتٸندەپ الىناتىنىن ايتادى.
8 مامىر 17.00-دەگٸ مەلٸمەتكە ساي, قازاقستاندا 4794 ادامنان ۆيرۋس تابىلدى. 1582 ادام دەرتتەن ايىقتى (جۇمادا 64 ادام جازىلدى). 31 ادام قايتىس بولدى.
