Sáýir aiynyń ortasyna qarai koronavirýs infektsiiasyn juqtyrý derekteri tómendei bastaýy tiis. Bul týraly QR Densaýlyq saqtaý ministri Eljan Birtanov aitty, dep habarlaidy "Ult aqparat".
«Tótenshe jaǵdai rejimin uzartý epidemiologiialyq jaǵdaiǵa, koronavirýs infektsiiasyn juqtyrý jaǵdaiyna bailanysty bolady. 15 sáýirden keiin virýs juqtyrǵandar azaiady dep úmittenip otyrmyz. Mundai jaǵdaida sheshimdi Memleket basshysy qabyldaityn bolady. Biz memlekettik komissiiada kún saiyn bul ahýaldy qarastyryp otyramyz. Degenmen jaǵdai teris órbitin bolsa, onda tótenshe jaǵdai rejiminiń uzartylatyndyǵy sózsiz», - dedi ministr vedomstvonyń Facebook-tegi paraqshasynda «Densaýlyq ministrligi habarlaidy...» degen aidarmen jariialanǵan videoda.
Onyń atap ótýinshe, boljamǵa sáikes, sáýir aiynyń alǵashqy on kúninde koronavirýsqa shaldyǵý deregi shyrqaý shegine jetýi múmkin.
«Degenmen qabyldanǵan karantindik sharalar bizdiń esepteýimizshe aýrýdyń taralýyn shamamen 50 paiyzǵa tómendetip otyr. Sondyqtan karantindik sharalardy saqtaý barynsha mańyzdy jáne ol munan ary da qatańdatylýy múmkin. Ony keshe Prezidentimiz de aitqan bolatyn. Bul infektsiianyń taralý jyldamdyǵyn aitarlyqtai tómendetýge yqpal etedi», - dedi Eljan Birtanov.
