Qazaqstanda meditsinalyq kómek kórsetýdiń qandai tásilderi qajet. Bul másele týraly Úkimet úiinde ótip jatqan otyrys barysynda QR Densaýlyq saqtaý ministri Eljan Birtanov, dep habarlaidy QazAqparat tilshisi.
«Elbasynyń tapsyrmasy boiynsha tegin meditsinalyq kómektiń kepildik berilgen kóleminiń (tegin meditsinalyq kómek) jańa úlgisi jáne mindetti áleýmettik meditsinalyq saqtandyrý (meditsinalyq saqtandyrý júiesi) júiesindegi meditsinalyq kómek paketi ázirlendi. Olar 2020 jyldyń qańtarynan bastap qoldanysqa enedi. Bul jumys BUU turaqty damý maqsattaryna sáikes júrgizildi. Jalpy tanylǵan álemdik densaýlyq saqtaý standarttary densaýlyqqa bailanysty qarjylyq táýekelderden qorǵaýdy, sondai-aq sozylmaly infektsiialyq emes aýrýlardy basqarýdy qamtamasyz etetin meditsinalyq-sanitarlyq qyzmettermen jappai qamtýdy aiqyndady», - dedi Eljan Birtanov Úkimet otyrysynda.
Ministrdiń aitýynsha, biýdjettik shyǵyndardyń jyl saiyn ulǵaiýyna qaramastan, tegin meditsinalyq kómekti qarjylandyrýdyń qazirgi deńgeii halyqtyń meditsinalyq kómekke ósip kele jatqan suranysyn qamtamasyz ete almai jatyr. Ministrliktiń baǵalaýynsha tegin meditsinalyq kómekti qarjylyq qamtamasyz etý tapshylyǵy tek 2017 jyly 363 mlrd teńgeni quraǵan.
«Sonyń saldarynan bul baǵyttaǵy shyǵyn 2017 jyly densaýlyq saqtaýdyń jalpy shyǵystarynyń 42 paiyzyna (678 mlrd tg) jetti. Bul Dúniejúzilik densaýlyq saqtaý uiymy usynǵan shekti deńgeiden eki ese joǵary», - dedi Eljan Birtanov.
Ministr atap ótkendei, joǵaryda aitylǵandardy eskere otyryp, halyqty meditsinalyq qamtamasyz etýdiń úsh deńgeili júiesi ázirlengen. Birinshi deńgei - QR barlyq azamattaryna, oralmandar men turaqty turatyn sheteldikterge memlekettik biýdjet esebinen tegin meditsinalyq kómek berýdi qamtamasyz etedi. Bul paket tegin meditsinalyq kómektiń mynadai túrlerin qamtidy: tirkelgen jeri boiynsha meditsinalyq-sanitarlyq alǵashqy kómek, jedel kómek, sanitarlyq aviatsiia jáne shuǵyl statsionarlyq kómek, dári-dármekpen qamtamasyz etýdi qosa alǵanda, áleýmettik máni bar aýrýlar men negizgi sozylmaly aýrýlar kezinde meditsinalyq kómektiń tolyq spektri. Ekinshi deńgei - saqtandyrylǵan halyq úshin meditsinalyq saqtandyrý júiesi paketi - ol tegin meditsinalyq kómekten tys qyzmetterdi qamtamasyz etip, aýrýlardyń keń spektri boiynsha konsýltatsiialyq, diagnostikalyq, josparly statsionarlyq kómek jáne tegin dári-dármekpen qamtamasyz etý, statsionardy almastyratyn kómek, ońaltý jáne qalpyna keltirý emin qamtidy. Úshinshi deńgei - bul tegin meditsinalyq kómek jáne meditsinalyq saqtandyrý júiesiniń paketterine kirmeitin meditsinalyq qyzmetter. Olar aqyly nemese erikti meditsinalyq saqtandyrý esebinen usynylady.
«Meditsinalyq kómek paketteriniń jobalaryn sarapshylar egjei-tegjeili pysyqtady. Olar óńirlerdiń densaýlyq saqtaý basqarmalarymen, múddeli memlekettik organdarmen, «Atameken» Ulttyq kásipkerler palatasymen kelisildi. Densaýlyq saqtaý ministrliginiń qoǵamdyq keńesinde qaralyp, maquldandy. Bekitýge usynylatyn meditsinalyq kómek paketterin qoldaýdy jáne 2020 jyldan bastap mindetti áleýmettik meditsinalyq saqtandyrý júiesin turaqty engizý úshin barlyq qajetti sharalardy iske asyrýdy qoldaýyńyzdy suraimyn», - dedi Eljan Birtanov.
Sondai-aq, Densaýlyq saqtaý ministrliginiń boljamy boiynsha derbes tóleýshilerdiń sany shamamen 1 mln adamdy quraǵan.
«1 mln adamnyń ishinde 770 myń adam - ózin-ózi jumyspen qamtyǵan azamattar. Osyǵan bailanysty, óńirlerdiń ákimderi 2019 jyldyń 1 qazanyna deiin ózin-ózi jumyspen qamtyǵan adamdardyń mártebesin naqtylaý, meditsinalyq-sanitarlyq alǵashqy kómek uiymdaryna bekitý jóninde qajetti sharalar qabyldaýy qajet. Tegin meditsinalyq kómektiń jáne meditsinalyq saqtandyrý júiesiniń jańa paketterin engizý birinshi kezekte halyqtyń áleýmettik turǵydan osal toptary úshin meditsinalyq kómektiń qoljetimdiligin arttyrýǵa baǵyttalǵan. Búgin zańnamamen jekelegen meditsinalyq qyzmetterdi alý úshin azamattardyń áleýmettik turǵydan osal 8 sanaty anyqtaldy. Olar: balalar, júkti áielder, kópbalaly analar, zeinetkerler jáne basqalar», - dedi Densaýlyq saqtaý ministri Eljan Birtanov Úkimet otyrysynda.
Ministrdiń aitýynsha, 2020 jyldan bastap meditsinalyq saqtandyrý júiesin engizý kezinde áleýmettik turǵydan osal halyqtyń 15 sanaty zańmen anyqtalǵan. Bul adamdar (olardyń sany shamamen 10,9 mln adam) memleket tarapynan saqtandyrylady.
«Meditsinalyq saqtandyrý júiesin engizý sheńberinde birqatar qyzmetterdiń qoljetimdiligi keńeitiledi. Olardyń sanatyna qymbat turatyn diagnostikalyq qyzmetter boiynsha qarjylandyrý 3 ese ósedi. Stomatologiialyq qyzmetterdi qarjylandyrý 2,3 ese ulǵaiady. Saqtandyrylǵan tulǵalar úshin meditsinalyq saqtandyrý júiesiniń paketi meditsinalyq kómektiń qoljetimdiligin aitarlyqtai arttyrýdy kózdeidi. Atap aitqanda, konsýltatsiialyq jáne diagnostikalyq kómekti qarjylandyrý 3 esege (80 mlrd tg), ońaltý jáne qalpyna keltirý kómegin qarjylandyrý 2,7 esege (39 mlrd tg) ulǵaitylatyn bolady», - dedi ol.
