QR densaýlyq saqtaý ministri Eljan Birtanov Úkimettiń baspasóz ortalyǵyndaǵy brifing barysynda Qazaqstandaǵy mindetti áleýmettik meditsinalyq saqtandyrý jumystary týraly tolyǵyraq aityp ótti, dep habarlaidy "Ult aqparat".
E. Birtanov MÁMS júiesi biylǵy jyldyń 1 shildesinen bastap iske qosylǵanyn jáne Saqtandyrý qoryna aýdarymdar men jarnalar túse bastaǵanyn málimdedi. Búgingi tańda buǵan jumys berýshiler men jeke kásipkerler qatysyp jatyr.
1 qańtardan bastap jarnalardy tóleýge ózin-ózi jumyspen qamtyǵan azamattar da qosylady, al memleket jarna tóleýden bosatylǵan halyqtyń 14 sanatyn, sonyń ishinde birinshi kezekte halyqtyń áleýmettik qorǵalmaǵan tobyn saqtandyratyn bolady. Jaldamaly jumysshylar júiege 2019 jyldyń 1 qańtarynan bastap qosylady. Sonymen qatar, barlyq azamattar saqtandyrylǵanyna nemese saqtandyrylmaǵanyna qaramastan, tegin meditsinalyq kómektiń kepildendirilgen kólemin (TMKKK) alatyn bolady.
«Qor jetkilikti túrde aýqymdy, ol barlyq shuǵyl ári jedel meditsinalyq kómekten, onkologiia, týberkýlez, psihiatriia jáne asa qaýipti juqpalar sekildi áleýmettik mańyzy bar aýrýlarǵa kómek kórsetýden, sondai-aq sanitarlyq aviatsiiadan turady. Búgingi tańda tizim bekitilgen. Budan ózge, barlyq azamattar aýrýǵa qarsy aldyn ala egýden ótýge quqyly, sonymen qatar 2020 jylǵa deiin barlyq ónimsiz ózin-ózi jumyspen qamtyǵandar, iaǵni áleýetti saqtandyrylmaityndardyń barlyǵy ambýlatoriialyq-emhanalyq kómektiń barlyq keshenin alyp, tegin dári-dármekpen qamtamasyz etiletin bolady. Bul halyqtyń barlyq toby meditsinalyq kómek alý kezinde esh shekteý kórmeýi úshin jasalyp jatyr», - dedi E. Birtanov.
Sondai-aq ol saqtandyrylatyn azamattar úshin saqtandyrý paketine kiretin meditsinalyq qyzmetterdiń tizimi ázirlengenin habarlady. Bul - ambýlatoriialyq-emhanalyq jáne turaqty kómek, tegin dári-dármekpen qamtamasyz etý.
«Jalpy, TMKKK jáne MÁMS paketteri bastapqyda bolmaǵan birqatar qyzmetterge ulǵaityldy, solardyń ishinde palliativtik kómek, meiirbike kútimi, meditsinalyq ońaltý jáne qymbat turatyn zerthanalyq zertteýlerdiń keibir túrleri bar», - dedi E. Birtanov.
