QR Densaýlyq saqtaý ministri Eljan Birtanov koronavirýs shyǵýyna bailanysty Japoniia jaǵalaýynda oqshaýlanǵan krýizdik lainerdegi qazaqstandyqtardyń jai-kúiine qatysty derekterimen bólisti, dep habarlaidy "Ult aqparat".
«Japoniianyń Densaýlyq saqtaý ministrligimen tikelei bailanysymyz bar. Olardyń derekterine sáikes, dál qazirgi ýaqytta olardyń da virýs juqtyrǵany (koronavirýsty) týraly aqparat joq. Munan bólek, azamattarymyzben de tikelei bailanystamyz», - dedi ministr Úkimet otyrysynan keiin.
Onyń atap ótýinshe, krýizdik kemedegi qazaqstandyqtardyń densaýlyq jaǵdailary jaqsy.
«Qazirgi ýaqytta biz Syrtqy ister ministrligimen birge elimizdiń azamattaryn Qazaqstanǵa jetkizý máselesin pysyqtap jatyrmyz», - dedi Eljan Birtanov.
Aita keterligi, keme 5 aqpannan beri karantinde tur. Karantin 19 aqpanda aiaqtalýy tiis. Ol aiaqtalǵan soń, azamattarymyzda koronavirýs belgileri bolmasa kemeden shyǵarylady.
Japoniia lainerden bosatylǵan jolaýshylardy jerge túskennen keiin taǵy bir márte tekserýdi josparlap otyr.
QR Syrtqy ister ministrliginiń málimeti boiynsha, keme bortynda qazaqstandyq eki áiel men 8 jáne 12 jasar eki bala bar. Olardyń jaǵdaiy jaqsy, shaǵymdary joq. Jolaýshylar tamaqpen jáne meditsinalyq qorǵaný quraldarymen qamtamasyz etilgen.
