3 sáýirde Densaýlyq saqtaý ministri Eljan Birtanov Qazaqstanda bir naýqastyń jaǵdaiy - óte aýyr, jan saqtaý bóliminde jatyr dep málimdedi.
"Qazirgi kezde 11 naýqastyń jaǵdaiy - aýyr, bireýiniń jaǵdaiy - óte aýyr. 68 adamnyń hali ortasha aýyr. 341 adamnyń jaǵdaiy jaqsy, aýrý belgileri baiqalyp otyrǵan joq" dedi Birtanov.
Onyń aitýynsha, Qazaqstan boiynsha 28 meditsinalyq qyzmetkerge koronavirýs juqqan. Epidemiologiialyq zertteýler bastalǵan.
Qazaqstanda sońǵy derek boiynsha barlyǵy 453 adamnan koronavirýs tabylǵan. 29 adam jazylǵan. Úsh adam qaitys bolǵan.
Koronavirýs juqtyrǵan adamdarmen bailanysty bolǵan 13 467 adam anyqtalǵan.
"Olardyń 442-si ketip qalǵan. Qalǵan 13 025 adam tabylyp, oqshaýlanǵan. 4340 adam statsionarlyq karantinde jatyr. 8381 adam úi karantininde. Osy baǵytta jumys jalǵasyp jatyr" dedi Birtanov.
Onyń aitýynsha, Almaty men Nur-Sultanda engizilgen qatań karantindik sharalardyń arqasynda koronavirýstyń taralý deńgeii turaqtanǵan. Virýs juqtyrǵandar sany kúnine 30 paiyzdan aspaidy.
Birtanov qazir aýdan men aýyldarda virýs taralyp jatqandyqtan shalǵai eldi mekenderde de karantindik sharalardy kúsheitý qajettigin aitty. Onyń aitýynsha, keibir eldi mekenderde "koronavirýs bizge kelmeidi dep oilaityn" adamdar bar.
