Burynǵy Densaýlyq saqtaý ministri Eljan Birtanovtyń isi boiynsha aǵylshyn tilinen orysshaǵa aýdarma jasaityn maman sot otyrysyna qatysýdan bas tartty, dep habarlaidy QazAqparat.
Bul osymen atalǵan is boiynsha sot usynǵan ekinshi aýdarmashy. Eks-ministr Eljan Birtanov pen burynǵy vitse-ministr Oljas Ábishevtiń advokattary aýdarmashynyń eńbek ótili, qujat aýdarmasyndaǵy tájiribesi, quqyq qorǵaý organdaryndaǵy týystaryna qatysty, bilimi men biliktiligi jáne basqa da múmkindikteri týraly suraqtar jaýdardy.
«Qorǵaýshylar tarapynan mundai kózqarastan soń, sot protsesine qatysýdan ózim bas tartamyn. Naqty bireýge qatysty narazylyǵym joq. Alaida bul is boiynsha otyrystarǵa qatysýdan bas tartamyn», - dedi aýdarmashy. Osy oraida ol mundai qadamǵa óz densaýlyǵyn oilap baryp otyrǵanyn aitty.
Sýdia Ibragim Álkenov aýdarmashyny tańdaýǵa qatysty másele 9 maýsymda qaralatynyn atap ótti. Biraq aýdarmashynyń quzyreti týraly másele qaralmaidy. Aýdarmashy iriktelgennen keiin, sot protsesi birden bastalady.
Óz kezeginde Eljan Birtanov qujattardy tolyqqandy aýdarýǵa ýaqyt kerek ekenin alǵa tartyp, qylmystyq istiń materialdarymen barlyǵy tanysýy úshin múmkindik berýdi surady.
Onyń aitýynsha, qujattar arasynda horvatiialyq Ericsson Nicola Tesla kompaniiasy tarapynan oryndalǵan jumystardy rastaityn málimetter bar. E. Birtanovtyń paiymynsha, osy qujattarmen tanysqannan keiin qylmys quramynyń bolmaýyna bailanysty, prokýrorlardyń ózderi isti toqtatý týraly málimdeme jasaýy múmkin.
Budan buryn habarlanǵandai, Densaýlyq saqtaý ministrliginiń burynǵy basshysy Eljan Birtanovtyń advokaty Nurlan Beisekeev sot otyrysynda Nur-Sultan qalasynyń №2 Saryarqa aýdandyq sotynyń sýdiasy Ibragim Álkenovke qarsy shaǵym bildirdi.
Biyl mamyr aiynda sýdia Ibragim Álkenov Eljan Birtanovtyń advokattary negizgi sot otyrysyna tartylǵan memlekettik aiyptaýshylar men Densaýlyq saqtaý ministrligi ókiline bildirgen qarsylyqty qabyldamai tastaǵan edi.
Eks-ministr Eljan Birtanov 2020 jyldyń 3 qarashasynda biýdjet qarajatyn ysyrap etti degen kúdikpen qamaýǵa alynǵan bolatyn.
Tergeý materialy boiynsha, Eljan Birtanov pen onyń kómekshisi bolǵan Oljas Ábishevke «laýazymdyq ókiletin teris paidalaný» arqyly memleketke 1,5 mlrd teńgeniń shyǵyny keltirgeni týraly aiyp taǵylyp otyr.
Al biyl 12 mamyrda sot Eljan Birtanovqa qatysty qylmystyq isti toqtatýdan bas tartqan.
