QR Densaýlyq saqtaý ministri Eljan Birtanov tanymal sportshy Denis Tenniń ólimine qatysty pikir bildirdi, dep habarlaidy Baq.kz tilshisi.
«Búgin saǵat 14:56-de Almaty qalasyndaǵy jedel járdem stantsiiasyna telefon arqyly brigada shaqyryldy. 10 minýttan keiin jedel járdem naýqastyń janynda bolǵan. Sol kezde dárigerler onyń Denis Ten ekenin bilgen. Onyń jaǵdaiy óte nashar bolǵan. Ol shuǵyl túrde 11 minýtta aýrýhanaǵa jetkizildi. Jolda dárigerler reanimatsiialyq sharalar jasady. Sebebi, klinikalyq ólim de bolǵan», - dedi ministr jýrnalisterge.
Keiin Birtanov Denis Tenniń kóp qan joǵaltýy saldarynan kóz jumǵanyn aitty.
«Aldyn ala statsionarǵa habar berilgen. Hirýrgtardyń barlyǵy daiyn otyrǵan. Ol tikelei operatsiialyq ústelge jatqyzyldy. Ókinishke qarai, 2 saǵat reanimatsiiadan soń, Denis Ten qaitys boldy. Ol qan kóp joǵaltqan», - dedi ol.
Sondai-aq Densaýlyq saqtaý ministri dárigerler tanymal sportshynyń ómirin aman saqtap qalý úshin qoldan kelgenniń barlyǵyn jasaǵanyn atap ótti.
«Meditsinalyq qyzmet tolyq kólemde kórsetildi. Qan kóp joǵaltýy saldarynan onyń ómirine qaýip tóngen. Tiisti qorytyndy patologiialyq-anatomiialyq zertteýden soń shyǵarylady. Ol jedel járdem qyzmeti kelgenshe kóp qan joǵaltqan», - dep túiindedi sózin Eljan Birtanov.
Eske sala ketsek, búgin Almatyda tanymal mánerlep syrǵanaýshy Denis Tendi pyshaqtap ketkeni habarlandy.
Qalalyq IID baspasóz qyzmetiniń habarlaýynsha, oqiǵa Qurmanǵazy Baiseiitova kósheleriniń qiylysynda búgin túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn. 2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
