2020 jyldyń aqpanyna qarai elimizdegi 400 myń meditsina qyzmetkeriniń jalaqysy taǵy 30 paiyzǵa artatyn bolady. Bul týraly búgin halyqpen eseptik kezdesý ótkizip jatqan QR Densaýlyq saqtaý ministri Eljan Birtanov aitty, dep habarlaidy QazAqparat tilshisi.
«Elbasy men Prezidenttiń tapsyrmasyna sáikes jalaqyny kóterý úshin barlyq qajetti sharalar osy aidan bastap qabyldanatyn bolady. Adamdar qolyna naqty alatyn jalaqyny 30 paiyzǵa kóterýdi maqsat tutyp otyrmyz. Degenmen, munyń da ózindik erekshelikteri bar. Kópshilik, halyq ta densaýlyq saqtaý salasyndaǵy jalaqyny Densaýlyq saqtaý ministri nemese memleket bekitedi dep oilaýy múmkin. Al is júzinde, bul olai emes. Biz meditsinalyq uiymdarǵa kórsetken qyzmeti úshin tóleimiz. Iaǵni, appenditsitti emdese onyń bekitilgen baǵasy bar. Ony tarif dep aitamyz jáne osy tarif arqyly jalaqy shyǵyndaryn qalyptastyramyz. Biz osy tarifti meditsinalyq qyzmetkerlerge aqsha jetýi úshin arttyramyz», - dedi E.Birtanov.
Onyń aitýynsha, ótken jyldyń ishinde dárigerlerdiń jalaqysyn arttyrý maqsatynda alǵashqy meditsinalyq-sanitarlyq kómek tarifi 20 paiyzǵa kóterilgen. Alaida, tariftiń kóterilýi dárigerlerdiń jalaqysynyń kóterilýine esh áserin tigize almaǵany anyqtalǵan.
«Biyl biz jańa tetikpen jumys isteimiz. Birinshi kezekte áleýmettik meditsinalyq saqtandyrý qory atalǵan aqshanyń barlyq meditsinalyq ortalyqtarda maqsatqa sai paidalanylýyn qadaǵalaityn bolady. Qor jalǵyz tóleýshi bolǵannan keiin, qosymsha talap qoiýǵa quqyly. Bul jumysqa kásipodaq federatsiialaryn tartamyz. Mundai jumys barlyq álemde bar. Biz qarjylandyrýdy arttyramyz, al kásipodaqtar jalaqynyń artýyn talap etetin bolady. Bul syzbanyń jumys isteitindigine senimdimin», - dedi ol.
Sonymen qatar ol bul jumysqa jergilikti atqarýshy organdardyń tarapynan baqylaý bolýy tiis ekendigin basa aitty.
«Dál osy syzbamen jyl saiyn jalaqyny arttyrýdy qarastyryp otyrmyz. 2020 jyly jalaqyny taǵy 30 paiyzǵa kóterýdi josparlaýdamyz. Ol úshin aqsha bar, bul aqshany sizdermen birge jinadyq. Tolyqtai alǵanda, aqpannan bastap kelesi jyldyń aqpanyna deiin barlyq salada jalaqy shamamen 70 paiyzǵa artatyn bolady. Bul 400 myń meditsina qyzmetkerine qatysty», - dedi ministr.
