QR Densaýlyq saqtaý ministri Eljan Birtanov meditsinalyq qyzmetkerlerdi yntalandyrý sharalaryn aityp berdi, dep habarlaidy "Ult aqparat".
«Naýryz aiynda 17,5 myń meditsina mamanyna 3 mlrd teńgeden astam somaǵa ústemeaqy tólendi. Ásirese, óńirlerde ákimdik janynan qurylǵan, quramyna oblystyń bas sanitary, densaýlyq saqtaý basqarmasy, jumyspen qamtý basqarmasy, kásipodaq pen «Nur Otan» partiiasynyń ókilderi kiretin komissiialar úlken jumys atqardy. Dál osy komissiia jibergen tizim boiynsha tólem jiberiledi», - dep jazdy ministr Facebook-tegi paraqshasynda.
Dert juqtyrý qaýpi joǵary topta naýryz aiynda 1395 qyzmetker (8%), ekinshi topta - 7081 (41%) jáne úshinshi topta - 8 949 (51%) maman jumys istegen. Eń kóp qarajat ekinshi top dárigerlerine jumsaldy - 1,8 mlrd teńge (54%), birinshi topqa respýblika boiynsha 717 mln teńge (21%), úshinshi topqa – 845 mln ( 25%) teńge tólengen.
«Epidemiiaǵa qarsy sharalarǵa tartylǵan eń kóp mamandar Almaty (3700), Nur-Sultan (1900) jáne Shymkent (2200) qalalarynda tirkeldi. Sáikesinshe, ústemeaqynyń basym bóligi osy qalalarǵa - Almatyǵa – 1,2 mlrd teńge, Nur-Sultanǵa – 646 mln teńge, Shymkentke - 360 mln teńge jiberildi.
«Ústemeaqy naýqaspen etene jumys istegen merzimge sáikes tólenetindikten alǵashqy topta ortasha tólem 514 myń teńge, ekinshi topta - 255 myń, úshinshi topta - 94 myń teńge bolǵan. Kóptegen óńirde naýqastar naýryz aiynyń ekinshi jartysynda paida boldy. Infektsiia juqtyrǵan naýqastar erterek anyqtalǵan óńirlerdiń ústemeaqysy da kóbirek tólendi. Máselen, Almaty qalasynda birinshi top mamandary - 674 myń teńge, Nur-Sultanda – 552 myń teńge, Qaraǵandy oblysynda – 438 myń teńge alǵan. Al Qostanai men ShQO-da naýryz aiynda birinshi top mamandaryna tólem júrgizilgen joq. Ekinshi top boiynsha eń kóp ústemeaqy Túrkistan oblysynda - 427 myń teńgeden, Nur-Sultan qalasynda - 347 myń teńgeden, Pavlodar oblysynda 316 myń teńgeden berilgen», - dep túsindirdi ministr.
Sonymen birge ministrdiń aitýynsha, búginge deiin elýden astam dáriger ústemeaqysy tolyq tólenbegenine, ádil berilmegenine shaǵymdanǵan.
«Árine, árbir oqiǵany jeke qarastyryp jatyrmyz. Biraq, eń aldymen óńirlerdegi áriptesterime aitqym keledi. Komissiialar tizim qurý kezinde ǵana belsendi jumys jasamai, turaqty rejimge kóshý qajet. Komissiia jumysyn ashyq ári kópke qoljetimdi etý kerek. Áleýmettik meditsinalyq saqtandyrý qory men onyń filialdary qaita esepteý men qosymsha hattamalar qabyldaýǵa ázir. Dál osy jaǵdaida ádiletsizdikke jol berilmeýi tiis - aǵattyq ketken jaǵdaida, dereý túzetýimiz kerek. Meniń elektrondy poshtama hat joldaýlaryńyzǵa bolady Birgemiz@dsm.gov.kz», - dedi Eljan Birtanov.
Aita keteiik, buǵan deiin «Əleýmettik meditsinalyq saqtandyrý qory» KEAQ basqarma tóraǵasy Aibatyr Jumaǵulov ústemeaqy men syiaqy alatyn meditsina mamandarynyń tizimi qalai jasalatynyn aityp bergen bolatyn.
