Densaýlyq saqtaý ministrligi meditsinalyq mekemelerge qatysty jańa normativti engizýdi kózdeidi. Sonyń aiasynda aýrýxanalardy ózara biriktirip, kópbeiindi emdeý mekemelerine ainaldyrý josparlanǵan. Ministr Eljan Birtanovtyń aitýynsha, ákimshilik apparatty qysqartýdyń arqasynda biýdjettiń biraz qarajatyn únemdeýge bolady, dep xabarlaidy QazAqparat tilshisi.
"Máselen, stantsionarlarǵa keletin bolsaq, Qazaqstanda emxanalarmen qamtamasyz etý kórsetkishi Ekonomikalyq damý jáne yntymaqtastyq uiymyna kiretin memleketterden 40 protsentke artyq bolyp tur. Sebebi bizde monoprofildi uiymdar kóp. Aýrýxanalarda jatyn oryndardyń ortasha sany 130-ǵa teń. Bul kórsetkish Dúniejúzilik bank usynǵan josparlardan tórt ese joǵary. Al álemdik tájiribege sáikes, jetekshi statsionarlar kópbeiindi, iaǵni ol jerde meditsinalyq qyzmetterdiń sany kóp. Osynyń arqasynda naýqasty júieli túrde emdeýge múmkindik bar", - dedi Birtanov Úkimettiń búgingi otyrysynda.
Osyǵan bailanysty elimizde aýdandyq jáne qalalyq emxanadardyń qurylymyn ózgertý kózdelip otyr. Al xalyqtyń sany jańa normativtiń basty sharty bolmaq. "Aýdandyq emxanalarda jańa meditsinalyq qyzmetter engiziledi. Al qalalarda monobeiindi statsionarlardy kópbeiindi stantsionarlarǵa ainaldyrý qarastyrylǵan. Bul degenimiz, balalar men úlkenderge arnalǵan emxanalarda qyzmet kórsetý túrleri artady. Kópbeiindi uiymdardyń ishinde arnaiy ortalyqtardy damytý jumysyna basymdyq beriledi", - dep atap kórsetti ministr.
Onyń aitýynsha, atalǵan sharalardyń nátijesinde meditsinalyq qyzmettiń tiimdi júiesin qurýǵa bolady. Al jeke-dara jumys isteitin emxanalardyń sany 360-tan 105-ke qysqarady. Bylaisha aitqanda, emxanalar men aýrýxanalar ózara birigip jumys isteitin bolady. Ákimshilik apparat qysqarsa da, qarapaiym meditsinalyq qyzmetkerler óz jumysyn istei beredi. Máselen, basqarýshy apparatty qysqartýdyń arqasynda jyl saiyn 10,7 mlrd teńgeni únemdeýge múmkindik bar.
"Ákimishlik qysqartý degenimiz, biz úsh bas dárigerdiń ornyna bir bas dáriger qoiamyz. Qazir bir bas dáriger aiyna 300-400 myń teńge alady. Oǵan qosa, orynbasarlary, býxgalteriiasy jáne taǵy basqa ákimshilik shyǵystar bar. Sonyń bárin únemdeýge bolady. Árine, únemdelgen aqshany qarapaiym meiirbikeler men dárigerlerdiń jalaqysyna jiberýge bolady", - dedi Densaýlyq saqtaý ministri Eljan Birtanov QazAqparat tilshisine bergen suxbatynda.
.jpeg)