QR Densaýlyq saqtaý ministri Eljan Birtanov Shymkenttegi juqpaly aýrýlar aýrýhanasynda 10 ailyq sábige ystyq sýmen klizma jasalý oqiǵasyna pikir bildirdi, dep habarlaidy QazAqparat tilshisi.
«Osy máselege orai Qoǵamdyq densaýlyqty baqylaý komitetiniń tóraǵasy Jandarbek Bekshinge tapsyrma berdim. Bul jaǵdai boiynsha arnaiy tekseris ótkizip, nátijesin halyqqa jetkizemiz. Standartty buzý nemese meiirbikelerdiń jumysynda tártip buzýshylyq bolsa, arnaiy jaýapkershilik máselesi sheshiledi. Ózim baqylaýda ustaimyn», - dedi ministr Úkimet otyrysynan keiingi baspasóz máslihaty barysynda.
Aita keteiik, elimizdiń birqatar basylymy Shymkenttegi juqpaly aýrýlar aýrýhanasynda 10 ailyq sábi ystyq sýmen klizma jasalǵannan keiin jansaqtaý bólimine túskendigin jazǵan bolatyn.
