Ortalyq kommýnikatsiialar qyzmetinde ótken brifingte QR Densaýlyq saqtaý ministri Eljan Birtanov Arys apaty kezinde aýyr jaraqat alǵan Aian Sháripbaevtyń jaǵdaiy týraly tolyqqandy aqparat berdi, dep habaralidy QazAqparat tilshisi.
Densaýlyq saqtaý ministri Aiannyń Arys qalasyndaǵy apat kezinde kólik astyna túsip, jaraqat alǵanyn eske saldy.
«Aian Sháripbaevtyń diagnozy - aýyr mi jaraqaty. Arys qalasynda kólik astyna túsken bolatyn. Birinshi kúni Shymkentte ota jasalǵan. Keiin ońalmaǵan soń Nur-Sultanǵa aldyrdyq. Jeti jasar Aiannyń jaǵdaiy birinshi kúnnen beri óz baqylaýymda. Qajetti mamandardyń bári kúndelikti konsiliým jasap, maǵan aqparat berip otyr», - dedi ol.
Eljan Birtanov Aian Sháripbaev jansaqtaý bóliminde jatqan №2 qalalyq aýrýhananyń elimizdegi eń ozyq meditsinalyq nysan ekenin aityp, balany jazyp alýǵa bolatynyna sendirdi.
«Ol nysan neirohýriýrgiialyq em jasaýǵa qajetti zamanaýi quraldardyń barlyǵymen jabdyqtalǵan. Mamandary da óte bilikti. Balanyń qazirgi jaǵdaiy óte aýyr bolǵanymen, sapaly meditsinalyq kómektiń arqasynda jazylyp ketedi degen úmit bar», - dedi ministr.
Eske sala keteiik, Arystaǵy jarylysta aýyr jaraqattanǵan eki bala Nur-Sultanǵa jetkizilgen bolatyn. Ministrdiń aitýynsha, elordaǵa aldyrylǵan ekinshi balanyń jaǵdaiy ońalǵan.
«Ekinshi balanyń jasy 11-de. Onyń jaǵdaiy ońaldy deýge bolady. Qazirgi tańda esin biledi. Jaraqaty jazylyp, boi túzep keledi», - dedi ol.
Aita ketsek, munyń aldynda densaýlyq saqtaý ministri Eljan Birtanov Arysta jańa emhana men aýrýhana salynatynyn aitqan bolatyn. Sondai-aq, Arystaǵy jarylystan zardap shekken eki adam áli jansaqtaý bóliminde jatyr.
