ورتالىق كوممۋنيكاتسييالار قىزمەتٸندە ٶتكەن بريفينگتە قر دەنساۋلىق ساقتاۋ مينيسترٸ ەلجان بٸرتانوۆ ارىس اپاتى كەزٸندە اۋىر جاراقات العان ايان شەرٸپباەۆتىڭ جاعدايى تۋرالى تولىققاندى اقپارات بەردٸ, دەپ حاباراليدى قازاقپارات تٸلشٸسٸ.
دەنساۋلىق ساقتاۋ مينيسترٸ اياننىڭ ارىس قالاسىنداعى اپات كەزٸندە كٶلٸك استىنا تٷسٸپ, جاراقات العانىن ەسكە سالدى.
«ايان شەرٸپباەۆتىڭ دياگنوزى - اۋىر مي جاراقاتى. ارىس قالاسىندا كٶلٸك استىنا تٷسكەن بولاتىن. بٸرٸنشٸ كٷنٸ شىمكەنتتە وتا جاسالعان. كەيٸن وڭالماعان سوڭ نۇر-سۇلتانعا الدىردىق. جەتٸ جاسار اياننىڭ جاعدايى بٸرٸنشٸ كٷننەن بەرٸ ٶز باقىلاۋىمدا. قاجەتتٸ مامانداردىڭ بەرٸ كٷندەلٸكتٸ كونسيليۋم جاساپ, ماعان اقپارات بەرٸپ وتىر», - دەدٸ ول.
ەلجان بٸرتانوۆ ايان شەرٸپباەۆ جانساقتاۋ بٶلٸمٸندە جاتقان №2 قالالىق اۋرۋحانانىڭ ەلٸمٸزدەگٸ ەڭ وزىق مەديتسينالىق نىسان ەكەنٸن ايتىپ, بالانى جازىپ الۋعا بولاتىنىنا سەندٸردٸ.
«ول نىسان نەيروحۋريۋرگييالىق ەم جاساۋعا قاجەتتٸ زاماناۋي قۇرالداردىڭ بارلىعىمەن جابدىقتالعان. ماماندارى دا ٶتە بٸلٸكتٸ. بالانىڭ قازٸرگٸ جاعدايى ٶتە اۋىر بولعانىمەن, ساپالى مەديتسينالىق كٶمەكتٸڭ ارقاسىندا جازىلىپ كەتەدٸ دەگەن ٷمٸت بار», - دەدٸ مينيستر.
ەسكە سالا كەتەيٸك, ارىستاعى جارىلىستا اۋىر جاراقاتتانعان ەكٸ بالا نۇر-سۇلتانعا جەتكٸزٸلگەن بولاتىن. مينيستردٸڭ ايتۋىنشا, ەلورداعا الدىرىلعان ەكٸنشٸ بالانىڭ جاعدايى وڭالعان.
«ەكٸنشٸ بالانىڭ جاسى 11-دە. ونىڭ جاعدايى وڭالدى دەۋگە بولادى. قازٸرگٸ تاڭدا ەسٸن بٸلەدٸ. جاراقاتى جازىلىپ, بوي تٷزەپ كەلەدٸ», - دەدٸ ول.
ايتا كەتسەك, مۇنىڭ الدىندا دەنساۋلىق ساقتاۋ مينيسترٸ ەلجان بٸرتانوۆ ارىستا جاڭا ەمحانا مەن اۋرۋحانا سالىناتىنىن ايتقان بولاتىن. سونداي-اق, ارىستاعى جارىلىستان زارداپ شەككەن ەكٸ ادام ەلٸ جانساقتاۋ بٶلٸمٸندە جاتىر.
