Densaýlyq saqtaý ministri Eljan Birtanov Nur-Sultandaǵy №2 qalalyq balalar aýrýhanasyna ózi baryp sanitarlyq aviatsiiamen jetkizilgen eki kishkentai naýqastyń jaǵdaiymen tanysty, – dep habarlaidy ministrliktiń baspasóz qyzmeti.
«№2 qalalyq balalar aýrýhanasynda balalardyń emine qajetti barlyq jaǵdai jasalǵan. Bilikti mamandardy shaqyrdyq, munda meditsinalyq apparattar men dári-dármek te jetkilikti. Balalardyń jaǵdaiy meniń jeke baqylaýymda bolady», - dedi QR Densaýlyq saqtaý ministri Eljan Birtanov.
2005 jáne 2011 jyldary týǵan eki kishkentai naýqas Nur-Sultandaǵy №2 qalalyq balalar aýrýhanasyndaǵy jansaqtaý bóliminde jatyr. Dárigerler eki naýqastyń da bas miy men kókiregin KT ótkizip, bireýine operatsiia jasady. Otadan shyqqan kishkentai patsienttiń jaǵdaiy óte aýyr. Ekinshisiniń jaǵdaiy - turaqty aýyr. Densaýlyq saqtaý ministri aýrýhana basshysyna naýqastardyń densaýlyǵyna qatysty qandaida bir ózgeris bolsa dereý málimet berip otyrýdy tapsyrdy.
