Úkimet otyrysynda QR Densaýlyq saqtaý ministri Eljan Birtanov 2016-2019 jyldarǵa arnalǵan «Densaýlyq» memlekettik baǵdarlamasyn júzege asyrý nátijeleri týraly aitty, dep habarlaidy QazAqparat tilshisi.
Ministrdiń aitýynsha, 2018 jyldyń birinshi jartyjyldyǵynda memlekettik baǵdarlamadaǵy 35 kórsetkishtiń ekeýine qol jetkizilmegen. Onyń biri - qan ainalym júiesi men tynys alý aǵzalary aýrýlary jáne qaterli isik bolsa, nátijege qol jetkizilmegen ekinshi kórsetkish - ana ólimi bolyp otyr.
«Ana ólimi boiynsha SQO, Aqmola, Qaraǵandy, Qyzylorda, ShQO, Jambyl, BQO, Túrkistan oblystarynyń kórsetkishteri tómen. Bul óńirlerge júrgizilgen taldaý birqatar negizgi sebepterdi anyqtady. Birinshiden, akýsher-ginekolog, reanimatolog, anesteziolog dárigerlerdiń tapshylyǵy. Ekinshiden, kóp óńirlerde densaýlyq saqtaý basqarmalarynda osy baǵyt boiynsha basshylardyń bolmaýy. Jáne árine, eń mańyzdysy - júkti áielderdiń kesh esepke alynýy. Ekstragenetaldyq patologiia deimiz, basqa da júieli aýrýlar sanynyń ósýi», - dep atap ótti Eljan Birtanov Úkimet otyrysynda.
Ministr ana óliminiń aldyn alý maqsatynda, densaýlyq saqtaý basqarmalarynyń bala kóterý jasyndaǵy áieldermen jumysty kúsheitý qajettigin jetkizdi. Jáne meditsinalyq uiymdarda uiymdastyrý, basqarý is-sharalaryn júrgizý qajet.
«Qurmetti Baqytjan Ábdiruly, sizdiń óńirlerdiń ákimderine olardyń qatysýymen joǵaryda kórsetilgen sharalardy oryndaý úshin, ana men bala ólimin tómendetý boiynsha óńirlik shtab otyrysyn ótkizýdi tapsyrýdy suraimyn. Sondai-aq, úshinshi toqsan qortyndysy boiynsha Úkimette osy másele boiynsha jeke keńes ótkizýdi suraimyn», - dedi ministr Úkimet basshysy Baqytjan Saǵyntaevqa qarata aitqan sózinde.
Aita keteiik, Úkimettiń búgingi otyrysynda QR Densaýlyq saqtaý ministri Eljan Birtanov pen Astana qalasynyń ákimi Áset Isekeshev elorda perzenthanasyndaǵy ana ólimi boiynsha jaýap berdi.
Keshe Astananyń №2 perinataldy ortalyǵynda jas bosanǵan kelinshek kóz jumdy. Ol - Astana perzenthanalarynda qaitys bolǵan tórtinshi adam.
