QR Densaýlyq saqtaý ministri Eljan Birtanovtyń aitýynsha, bir jerde aýrýxanada naýqastarǵa oryn jetpei jatsa, kelesi jerlerde kerisinshe emxana oryndary tym kóp bolyp ketken. Bul - densaýlyq salasynyń infraqurylymyn durys josparlamaýdyń kórinisi, dep xabarlaidy QazAqparat.
Ministrdiń aitýynsha, búgingi tańda densaýlyq saqtaý salasynyń infraqurylymyn damytýdyń biryńǵai jospary daiyndalyp jatyr. "Qazaqstanda 7914 densaýlyq saqtaý mekemesi bar. Sonyń ishinde 85,5 protsent - memlekettik emxanalar bolsa, 14,5 protsenti jeke menshikke tiesili. Meditsinalyq uiymdardyń teń jartysy 30 jyl buryn salynǵan. Ótken jyly 11 myńǵa jýyq adam aýrýxanaǵa jatqyzýdy 90 kúnnen astam ýaqyt kútken. Alaida respýblika boiynsha 4,2 myń jatyn oryn bos turdy. Osynyń ózi - durys jospar qurmaýdyń dáleli", - dedi E. Birtanov Úkimettiń búgingi otyrysynda.
Onyń paiymynsha, qazirgi kezde jergilikti atqarýshy organdary meditsina salasyn damytýǵa 1 trln teńgeni surap otyr. Degenmen, qurylys nysandaryn josparlaý kezinde olardyń biýdjet aqshasyn kóptep alýǵa degen qulshynysy da joq emes. Máselen, Astanada balalarǵa arnalǵan infektsiialyq emxanada bir jatyn orynǵa 240 sharshy metr qarastyrylǵan. Ondai kórsetkish xalyqaralyq talaptardan eki ese artyq, al respýblika boiynsha salynatyn nysandardyń kórsetkishinen alty ese joǵary bolyp tur. Osylaisha, bir jatyn orynǵa biýdjettiń biraz aqshasy ketip jatady.
«Ambýlatorlyq mekemeni salý kezinde naqty qajettilik, iaǵni jergilikti xalyqtyń sany eskerilmeidi. Osynyń saldarynan jatyn oryndar bos turady. Jergilikti atqarýshy organdar biýdjet qarajatyn tiimdi jumsaýǵa jaýapsyz qaraidy. Sondyqtan bizge densaýlyq saqtaýdyń infraqurylymyn damytýdyń biryńǵai jospary asa qajet", - dep atap ótti ministr.
