Memleket basshysy Qasym-Jomart Toqaevtyń atyna qasietti Ramazan aiynyń bastalýyna orai shet memleketterdiń basshylarynan jáne halyqaralyq uiymdardyń jetekshilerinen quttyqtaý hattar men jedelhattar kelip túsýde.
Bul týraly Aqordanyń resmi saitynda habarlandy.
Ózbekstan Prezidenti Shavkat Mirziioev jedelhatynda Qasym-Jomart Toqaevqa uzaq ómir, zor densaýlyq jáne onyń asa jaýapty qyzmetine tabys tilep, baýyrlas Qazaqstan halqynyń ósip-órkendei berýine niettestik bildirgen. Sondai-aq Shavkat Mirziioev eki el arasyndaǵy qarym-qatynastardyń qarqyndy damyp kele jatqanyn atap ótken.
«Eki el arasyndaǵy tatý kórshilikke, jaqyn dostyqqa, ózara qurmetke jáne qoldaý kórsetýge negizdelgen strategiialyq seriktestik ortaq saiasi erik-jigerimizdiń arqasynda sońǵy jyldary múlde jańa deńgeige kóterilgeni kúmánsiz. Bizdiń tabysty bailanystarymyz ben uzaqmerzimdi seriktestigimiz odan ári dami beretinine senimdimin», – delingen Ózbekstan basshysynyń jedelhatynda.
Saýd Arabiiasynyń Koroli Salman ben Ábdeláziz Ál Saýd jáne Saýd Arabiiasy Koroldiginiń Taq murageri Muhammed ben Salman ben Ábdeláziz Ál Saýd ózderiniń jedelhattarynda Qazaqstan Prezidentin qasietti Ramazan aiynyń bastalýymen quttyqtap, oǵan zor densaýlyq jáne baqyt tilegen, sondai-aq, baýyrlas Qazaqstan halqynyń odan ári ósip-órkendei berýine tilektestik bildirgen.
Sonymen qatar Qazaqstan Prezidentine Qatar Ámiri Sheih Tamim ben Hamad Ál Táni, Iordaniia Koroli II Abdalla, Oman Sultany Haisam Ben Tariq, Kýveit Ámiri Sheih Navaf ál-Ahmad ál-Djaber Ás-Sabah, Kýveittiń Taq murageri Mishal ál-Ahmed ál-Djaber Ás-Sabah, Bahrein Koroli Hamad ben Isa Ál Halifa, Marokko Koroli VI Muhammed, Egipet Prezidenti Ábdel Fattah Ás-Sisi, Irak Prezidenti Barham Saleh, Palestina Prezidenti Mahmýd Abbas, Qatar Sheihiniń orynbasary Abdalla Ben Hamad Ál Táni jáne Islam yntymaqtastyǵy uiymynyń Bas hatshysy Iýsef ál-Oseimin ózderiniń quttyqtaý hattaryn joldady.
