Qostanai oblysynyń politsiia qyzmetkerleri «Hi-tech» jedel aldyn alý is-sharasyn ótkizý kezinde internet arqyly nesie rásimdegen kúdiktiler ustady, dep habarlaidy "Ult aqparat".
Oblystyq politsiia departamentiniń málimetinshe, jedel operatsiia aqparattyq tehnologiialar, avtorlyq quqyqtardy qorǵaý salasyndaǵy qylmystarmen kúrestiń tiimdiligin arttyrýǵa baǵyttalǵan. Eki kúnniń ishinde kriminaldyq politsiia qyzmetkerleri 13 internet-alaiaqty anyqtady. Máselen, Qostanai qalasynda politseiler bes fakti boiynsha internet-alaiaqtyq jasady degen kúdikpen 26 jastaǵy jergilikti turǵyndy ustady.
«Qaskúnem oblys ortalyǵynyń turǵyndaryna shaǵyn nesie uiymdarynyń birinen onlain nesie rásimdegen. Ótinish berýshilerge keltirilgen jalpy shyǵyn million teńgeden asty. Kúdikti zardap shekkenderdiń birine 900 myń teńgege jýyq somaǵa nesie rásimdegen», delingen vedomstvo habarlamasynda.
Taǵy biri onlain saýda jasaý jolymen paida tapqysy kelgen. Tártip saqshylary osy derek boiynsha Qostanai qalasynyń 25 jastaǵy turǵynyn qolǵa túsirdi.
«Koronavirýs pandemiiasy kezinde qorǵanys quraldaryn satý arqyly zańsyz aqsha tappaq bolyp, saittardyń birinde rezeńke qolǵaptar týraly habarlandyrý ornalastyrǵan. Oǵan eldiń ár oblysynan qońyraýlar túsken. Mysaly, Almaty oblysynyń turǵyny kúdiktige 36 myń rezeńke qolǵapqa tapsyrys berip, bir jarym million teńgeden astam aqsha jibergen. Taýar ótinish berýshige kelmegen. Alaiaq SQO men Aqmola oblystarynyń turǵyndarynan 1 mln 30 myń teńge aqsha alǵan», - deidi politsiianyń baspasóz qyzmeti mamany Kenje Qonysbai.
Qazir barlyq derekter boiynsha sotqa deiingi tergeý amaldary júrgizilýde.
