Beibitshilik pen bereke saltanat qurǵan toiǵa Elbasy Nursultan Nazarbaev ta at basyn tirep, Qazaqstan halqynyń birligi kúnine arnalǵan merekelik sharanyń qonaǵy boldy.
Memleket basshysyn Qazaqstan halqy Assambleiasynyń etnomádeni uiymdary men ortalyqtarynyń ókilderi «Qazaq eli» monýmenti aldyndaǵy alańda ózderiniń ulttyq salt-dástúrin kórsetip, án aityp, bi bilep úlken syi-qurmetpen qarsy aldy. Óz kezeginde, Elbasy barsha qazaqstandyqtardy jáne sharaǵa qatysýshylardy memlekettik merekemen quttyqtady.
– Barshańyzdy ortaq meiramymyz – Qazaqstan halqynyń birligi kúnimen quttyqtaimyn. Birliktiń arqasynda biz táýelsiz memleket bola bildik. Bir shańyraq astynda tatý-tátti kún keship kelemiz. Bizdiń birligimizdi bútin ulys dáriptep otyr. Elimizge álemniń túkpir-túkpirinen birligi bekem kópultty memleketti qalai qurý kerek ekenin úirený úshin keletinder bar, – dedi Qazaqstan Prezidenti.
Elbasy elimizdiń úlken jetistikter men jeńisterge kópultty Qazaqstan halqynyń birligi men dostyǵynyń arqasynda qol jetkizgenin tilge tiek etti.
– Birligimizdiń arqasynda biz ozyq damyǵan 30 eldiń qataryna qosylý jáne halyqtyń ál-aýqatyn arttyrý úshin ózimizge aýyr jaýapkershilik júktedik. Halqymyzdyń bereke-birliginiń arqasynda men árbir qazaqstandyqtyń ómir súrý jaǵdaiyn jaqsartýǵa baǵyttalǵan «Prezidenttiń bes áleýmettik bastamasyn» jariia ettim, – dedi Nursultan Nazarbaev.
Elbasy memlekettiń búgingi jetistikteri men jeńisterin eldegi birlik pen tatýlyqtyń jemisi dep baǵalai otyryp, halyqtyń turmystyq jaǵdaiyn, ál-aýqatyn kóterýge baǵyttalǵan bastamalar eldiń damýyna serpin beretindigine senim bildirdi. Barshamyzǵa ortaq bailyq pen baqytty qorǵai bilýimiz kerektigin eskertken Prezident, totalitarlyq rejim óz ýaqytynda qazaq dalasyna birqatar etnos ókilderin kúshpen kóshirgendigin, alaida jergilikti halyq – qazaqtyń tereń qurmeti men aq-adal peiiliniń arqasynda olardyń aman qalǵandyǵyn atap ótti. Búgingi kúni sol qýǵyndalǵan býynnyń urpaqtary qazaq halqymen qoltyqtasa, iyq-tirese eńsesin kóterip, memleket qurýǵa atsalysyp, el damýyna ólsheýsiz úlesin qosýda.
Sóz sońyndaǵy tilekte Memleket basshysy óskeleń urpaqtyń bolashaǵynyń jarqyn bolýyna niettestik bildirip, ár otbasyǵa tynyshtyq, baq-bereke, amandyq tiledi.
– Biz elimizdegi alýan túrli mádenietterdiń, barlyq tilder men dástúrlerdiń de órkendep kele jatqanyn kórip otyrmyz. Biz – birtutas halyqpyz, bir-birimizdi qurmet tutamyz ári jaqsy kóremiz, ortaq Konstitýtsiia men zańdarǵa baǵynamyz. Bir-birimizdi syilap, dostyq qarym-qatynasta bolý – zor baqyt. Osy birligimizdi saqtap, baqytymyzdyń qadirin bileiik! – dedi Nursultan Nazarbaev.
Elbasynyń saliqaly, sarabdal saiasatynyń arqasynda Qazaqstan halqynyń júregi de, tilegi de – bir. Biz muraty - aiqyn, ortaq maqsatqa umtylǵan jasampaz el boldyq. Bul sózderdi Májiliske Qazaqstan halqy Assambleiasy atynan sailanǵan depýtat – Narine Mikaelian rastai tústi. Ol Qazaqstan halqy Assambleiasy HHVI sessiiasynan alǵan áserimen de bólisip, osynaý mereili merekege orai izgi tilekterimen bólisti.
– Qazaqstan halqy birligi kúnimen shyn júrekten quttyqtaimyn. Barsha halyqty uiystyratyn eń izgi, eń ǵajaiyp ulyq mereke yntymaqtyń kieli shańyraǵy – Astana qalasynda óz deńgeiinde toilanyp jatyr. Uly Dala eli búgin múlde bólek kúige túrlendi. Keshe ǵana ótken Assambleianyń sessiiasy da mazmundy, maǵynaly bolyp, Memleket basshysy bizderge biraqtara naqty tapsyrma júktedi. Endi «Prezidenttiń bes áleýmettik bastamasyn» júzege asyrýǵa kúsh salyp, ony halyq arasynda keńinen nasihattap, zańdyq negizin qalyptastyrýǵa qal-qaderimizshe úlesimizdi qosýdan aianbaimyz. Halyqtyń turmystyq jaǵdaiyn, iaǵni ál-aýqatyn kóterýge baǵyttalǵan aýqymdy bastamalardyń qysqa ýaqytta, sonymen qatar sapaly oryndalýyna múddeli ekenimiz anyq. Osy maqsat búgingi merekeniń de shyraiyn keltirip turǵandai. Aspanymyz árdaiym ashyq bolsyn, halyq qýaty hám ál-aýqaty arta bersin! – dedi N. Mikaelian.
Sharanyń kontserttik baǵdarlamasy da airyqsha boldy. Ásem bezendirilgen sahnaǵa barsha etnos ókilderi ulttyq kiimderimen jarqyrap shyqty. Eń aldymen qonaqtar elordalyq mádeni birlestikterdiń shyǵarmashylyq ujymdarynyń, estrada juldyzdarynyń jáne Astana qalasy Memlekettik akademiialyq filarmoniiasy ártisteriniń qatysýymen ótken «Rýhani jańǵyrý – birlik pen tutastyq negizi» atty teatrlandyrylǵan qoiylymdy tamashalady. Kontserttik baǵdarlamany «Týretskii horynyń» «Prazdnik pesni» án keshi jalǵap, erler ujymymen birge sahna tórinde «Týretskiidiń» SOPRANO áielder toby óner kórsetti. Odan bólek, Qazaqstan halqy Assambleiasynyń etnomádeni birlestikteri de merekege bailanysty ánnen shashý shashty.
Kontsert aiaqtalǵan soń jinalǵan jurt sporttyq oiyndardy qyzyqtady. «Qazaq eli» monýmentiniń aldyndaǵy alańda qazaq kúresi, arqan tartys, asyq atý, gir tasyn kóterý jáne qol kúres sekildi ulttyq sport túrlerinen jarystar ótkizilip, oǵan qala turǵyndary da belsendi qatysyp, mereke mánin odan ári arttyra tústi.
Mamyrajai mamyrdyń birinshi juldyzynda Astana shaharynda merekelik is-sharalar kóp boldy. Tús áletinde «Báiterek» monýmentiniń aldyndaǵy alańda «Dostyq sherýi» atty velosherý óz bastaýyn aldy.
Sonymen qatar 500 dombyrashydan quralǵan «Uly Dala úni» atty fleshmob uiymdastyrylyp, qala turǵyndaryna erekshe merekelik kóńil-kúi syilady. Al, osy ýaqytta qala kitaphanalarynda, mýzeilerinde, teatrlarynda jáne basqa da mádeniet mekemelerinde birlik pen dostyq merekesine arnalǵan ártúrli taqyryptyq kórmeler, qoiylymdar men kontsertter ótkizilgen-tin.
Serik ÁBDIBEK
