Foto: QR MAM
Roza Baǵlanova atyndaǵy «Qazaqkontsert» memlekettik akademiialyq kontserttik uiymynyń BIRLIK ansambli Japoniianyń Osaka qalasyndaǵy EXPO 2025 halyqaralyq kórmesinde óner kórsetti, dep habarlaidy Ult.kz.
Osydan bir ǵasyr buryn 1925 jyly Frantsiia astanasynda ótken EXPO kórmesinde tuńǵysh ret qazaq mádenietin álemge tanytqan Ámire Qashaýbaevtyń ónerine jurt tánti boldy. Tórtkúl dúniege jol ashqan Ámireniń jolyn BIRLIK ansambli jalǵady.
Ansambl Qazaqstan Respýblikasy Ulttyq kúnine arnalǵan saltanatty ashylý rásimi men gala-kontsertine qatysty. Is-sharaǵa 158 el, 9 halyqaralyq uiym qatysty.
Foto: QR MAM
Óner ujymy Osaka qalasyndaǵy Ray Garden sahnasynda jáne Swissotel Nankai Osaka qonaq úiiniń saltanatty zalynda óner kórsetip, kópshilik kóńilinen shyqty. Kontserttik baǵdarlamada kórermen nazaryna «Kúi shashý», «Aqqý», «Salkúreń» jáne t.b. basqa da dástúrli biler usynyldy.
BIRLIK ansambli - jahandaný zamanynda ulttyq qundylyqtardy ulyqtap, elimizdiń mádenietin álemge tanytyp júrgen biregei óner ujymy.
Aita keteiik, atalmysh ansambl QR Mádeniet jáne aqparat ministrliginiń qoldaýymen 2024 jylǵy 1 naýryz Alǵys aitý kúnine orai quryldy. Osylaisha, Qazaqstan men TMD elderi tarihynda tuńǵysh ret kópetnosty án men bi ansambli jasaqtaldy.
Ujymnyń repertýary qazaq halqynyń tarihymen jáne táýelsiz Qazaqstannyń qalyptasýymen tyǵyz bailanysty 130 etnostyń mýzykalyq murasy men ónerin qamtidy.
Osakada QR Ulttyq kúnine orai Qazaqstannyń týy kóterilgenin jazǵanbyz.
