Qazaqstanǵa halyqaralyq saýda normalaryn buzyp, 24 júk kólikpen fitosanitarlyq sertifikaty joq ósimdik ónimderin tasymaldaýǵa tyrysqan importtaýshylarǵa aiyppul salynyp, olar qara tizimge engizildi. Sonymen qatar, olarǵa 30 kún ishinde QR jáne RF aýmaǵynda shekteýli sanktsiialar qoldanylady, dep habarlaidy "Ult aqparat" AShM baspasóz qyzmetine silteme jasap.
Aǵymdaǵy jyldyń 24-27 shildesi aralyǵynda Batys Qazaqstan oblysyndaǵy «Syrym» fitosanitarlyq baqylaý beketine Resei Federatsiiasynan karantinge jatqyzylǵan ónim: 10 – astyq, 5 – kartop, 4 – jemis, 3 – limon, 2 – banan tielgen 24 avtokólik kelgen.
Karantindik fitosanitarlyq baqylaý barysynda QR AShM memlekettik inspektorlary taýarlardyń fitosertifikattary joqtyǵyn anyqtady. Bul óz kezeginde halyqaralyq saýda normalaryn, ósimdikterdi qorǵaý jáne ósimdikter karantini jónindegi halyqaralyq konventsiianyń jáne Eýraziialyq ekonomikalyq odaq talaptaryn óreskel buzý bolyp sanalady (EAEO sharty, EEK Keńesiniń 2016 jylǵy № 157 sheshimi, KOK 2010 jylǵy № 318 sheshimi).
«EAEO Ósimdikter karantinin qamtamasyz etý týraly» Kedendik odaq Komissiiasynyń 2010 jylǵy 18 maýsymdaǵy №318 qaýlysyna sáikes, «EAEO kedendik aýmaǵynda karantindik fitosanitarlyq baqylaýdy (qadaǵalaýdy) júzege asyrý tártibi týraly Erejege» jáne «Ósimdikter karantini týraly» QR Zańyna sáikes fitosanitarlyq qaýiptiligi joǵary ónimderdi respýblika aýmaǵyna eksporttaýshy eldiń fitosanitarlyq sertifikatynsyz tasymaldaýǵa qatań tyiym salynady.
Osynyń negizinde barlyq 24 avtokólik toqtalyp, sonyń saldarynan QR jáne RF shekarasy arasyndaǵy jolda uzyn-sonar kezek paida boldy.
Alaida, eki eldiń beketteri arasyndaǵy keptelis saldarynan týyndaǵan qolaisyzdyqqa bailanysty, sondai-aq azyq-túlik baǵasyn turaqtandyrý maqsatynda júkterdiń fitosanitarlyq jaǵdaiy tereń zerthanalyq zertteýden ótkizilip, syrtqy ekonomikalyq qyzmetke qatysýshylarǵa aiyppul salyp jáne EAEO ósimdikter karantini salasyndaǵy zańnamasyn buzýshylar tizimine engizilgennen keiin júk kólikteriniń Qazaqstanǵa kirýine ruqsat etildi.
Sondai-aq, atalmysh importtaýshylarǵa 30 kúntizbelik kún ishinde Qazaqstan Respýblikasy men Resei Federatsiiasynyń aýmaǵynda fitosanitarlyq sertifikattar ala almaityndyǵy túsindirildi.
Sonymen birge, QR AShM Agroónerkásiptik keshendegi memlekettik inspektsiia komiteti Resei aýyl sharýashylyǵyn baqylaý komitetimen osyndai zań buzýshylyqtardyń aldyn alý jáne syrtqy ekonomikalyq qyzmetke qatysýshylar arasynda túsindirý jumystaryn kúsheitý boiynsha is-sharalardyń biryńǵai algoritmin ázirleý jóninde kelissózder júrgizýdi josparlap otyr.
Sonymen qatar, Agroónerkásiptik keshendegi memlekettik inspektsiia komiteti Qazaqstan shekarasynda karantindik fitosanitarlyq baqylaýdy kúsheitip, zań buzýshylarǵa qatysty qatań sharalar qoldanady.
